Sa prima versione de Topolino e Minnie como est lìbera dae sos deretos de autore e est in su pùblicu domìniu paris cun medas àteras òperas publicadas in su 1928. S’iscadèntzia simbòlica at corfidu sos personàgios de su curtzumetràgiu animadu Steamboat Willie dirìgidu dae Walt Disney. Como at a èssere possìbile adatare sa pellìcula sena arriscos legales e sena dèpere pagare dinari.
In prus dae su primu de Ghennàrgiu 2024 sunt como de pùblicu domìniu sa versione teatrale de Peter Pan de J.M. Barrie, sos romanzos S’Amante de Lady Chatterley de D.H. Lawrence e Orlando de Virginia Woolf, s’originale tedescu de “Niente di nuovo sul fronte occidentale” e “L’opera da tre soldi” de Bertold Brecht.
Steamboat Willie est cunsideradu su primu film de sa sèrie de Topolino nointames in realidade est su de tres curtzumetràgios de animatzione de sa sèrie. Est in prus famadu pro èssere su primu cartone animadu chi tenet una colunna sonora cun mùsicas, efetos sonoros e diàlogos (finas chi non sunt cumprensìbiles) de su totu sincronizada. Sa fama otenta l’aiat giutu a èssere ammentadu comente a su primu cartone animadu cun sonoru sincronizadu.
Cada annu sunt medas sas òperas chi benint liberadas dae sos deretos de autore, un’eventu chi cunsentit de lèghere e castiare custas òperas pro mediu de prataformas in lìnia comente a Google e de creare versiones noas.
Sa Disney, nòdida pro amparare su copyright suo, aiat giogadu unu ruolu crae in su de perlongare sos amparos de su deretu de autore in su 1998 cun su “Mickey Mouse Protection Act”. In su 2024, isceti sa versione ispetzìfica de Steamboat Willie at pèrdidu su copyright, mentras ant a abarrare amparadas sas òperas cun Mickey Mouse, inclùdidu s’icònicu sòrighe cun pantalones curtzos rujos e guantes biancos. (A. D)
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
