Mùsica cun deghinas de mìgias de pessones in pratza. Sa Sardigna at acollidu s’annu nou cun cuntzertos e ispetàculos in medas tzitades e biddas.
In Terranoa ant tzelebradu s’agabbu de su 2024 cun su cuntzertu de I Pinguini Tattici Nucleari, in Tàtari cun Gianna Nannini, in S’Alighera nche fiant sos Negramaro, Irama e Elodie in Casteddu Sardu, Stewart Copeland de sos Police in Casteddu, Irene Grandi in Bosa), Gaia in Aristanis.
In Terranoa una truma de mìgias de pessones dae su mangianu est arribbada in sos caminos de su tzentru istòricu. Sa tzitade gadduresa at saludadu s’arribu de s’annu nou subra de sas notas de sos petzos prus famados de I Pinguini Tattici Nucleari chi de sas 22.30 ant allumadu su palcu ammaniadu a su Molu Brin dae in antis 40mìgia pessones.
In Casteddu a pustis de chimbe annos est torrada sa festa ispainada in chimbe pratzas de su tzentru. Su cuntzertu prus de importu est istadu in pratza de Yenne cun Stewart Copeland, artista famadu in totu su mundu pro èssere istadu batterista e fundadore de su grupu Police in paris cun Sting. Festa finas in su bighinadu de Casteddu ‘e susu e Biddanoa.
Bene meda finas su cuntzertu de Gianna Nannini chi in Tàtari at cantadu pro un’ora e mesu branos de 45 annos de carriera faghende ballare e aboghinare binti mìgias persones.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
