Una persona malàida de Sla podet ghiare unu drone cun is ogos e sa mente In Sardigna est arrenneschidu un'esperimentu chi diat podere èssere de importu mannu

Unu malàidu de Sla podet ghiare unu drone sceti cun is ogos e sa mente. Ddu podet fàghere gràtzias a unu software nou chi permitet de rilevare s’atividade de su cerbédhu (is undas tzerebrales) e su muvimentu de sa mirada. Custa possibilidade de controllu remotu est istada dimustrada pro sa prima borta in Itàlia cun nd’una sèrie de proas fatas acanta a s’ispàtziu aèreu de su Polìgonu interforze de Chirra, in Ogliastra. Una

Su resurtadu est istadu otentu gràtzias a su progetu Slapp (Sclerosis lifeline app) pensadu dae 3D Aerospazio, sotziu de su Distretu aerospaziale de sa Sardigna (Dass), in paris cun s’ala clìnica de s’Aou de Casteddu e de s’Istitutu Auxologico de Milanu (Irccs) e cun sa consulèntzia de s’Enac (s’ente de s’aviatzione).

Sa proa at bidu impinnada una persona chi at ghiadu su drone impreende, a segunda de sas netzessidades, sa mirada o su pensamentu. “Su controllu mentale – at naradu a s’Ansa su cumandante Antonio Depau de 3D Aerospazio  -,mancari giai isperimentadu àteras bortas, est galu de si cunsiderare in prena fase evolutiva pro cantu pertocat sa seguresa e sa pretzisione de su cumandu, pro ite est de importu mannu s’istadu de ànimu de s’operadore. Cun sa fusione de sos duos sistemas de controllu guvernada dae su software in manera apòsita custu problema non b’est prus”.

Espertos narant chi sos resurtados otènnidos ant a pòdere permìtere a mìgias de persones chi presentant limitatziones funtzionales terrorosas comente sos malàidos malàidos de Sla, de pilotare unu drone e pòdere bìdere s’ambiente comente chi ddu sunt biende cun is ogos. Giai in su 2019, Paolo Palumbo su prus giòvanu malàidu de Sla in Europa fiat arrenneschidu a ghiare cun sutzessu su bolu de unu drone a distàntzia gràtzias a unu puntatore oculare modificadu e a su programma pensados dae sa sotziedade 3D Aerospazio: aiat ghiadu dae sa domo sua in Aristanis unu drone finas a Foghesu. L.M

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.