Lollove immoe faghet parte de su grupu de sos burgos prus bellos de Itàlia: s’assòtziu chi riunit sos piticos tzentros italianos cun sa punna de nd’amparare istòria e traditziones, at aprovadu sa dimanda presentada dae su Comunu de Nùgoro.
Duncas s’antigu burgu medievale a 15 chilòmetros dae Nùgoro at a cumpàrrere in sa ghia 2022 de s’assòtziu in sa setzione de sos burgos sardos in ue bi sunt giai Atzara, Bosa, Carluforti, Casteddu Sardu, Sa Madalena, Pasada e Sàdili. In beranu s’at a tènnere sa tzerimònia pro sa cunsigna de s’atestadu e de sa bandera.
“Lollove – narat su sìndigu Andrea Soddu – faghet parte de su passadu nostru, tando nos tocat a dda amparare e avalorare, faghende·la connòschere semper de prus a foras de sos làcanas de sa Sardigna”.
S’assòtziu “I borghi più belli d’Italia” naschet in su 2001 cun s’obietivu de avalorare su patrimoniu de istòria, arte, cultura, ambiente e traditziones presente in custos piticos tzentros italianos.
Leghe·ti finamentas Lollobe, una prenda pitica chi balet
