Est essidu dae pagu su libru de Maurizio Pretta intituladu “Padre Michele Todde, dalla Sardegna ad Assisi, una vita a servizio degli altri”. Imprentadu dae Grafiche del Parteolla, curadu dae Costantino Floris e antitzipadu dae un’iscritu de Gianfranco Tore, su volume nos contat sas acontèssidas de su religiosu tonaresu.
Nàschidu su 1882, Micheli creschet cun su tziu Pietro Carboni (retore parrochiale in Dèsulu) sende chi fiat òrfanu de babbu e de mama. Est in cue chi pigat a riferimentu suo sa figura de Santu Frantziscu: a deghessete annos disinnat de si fàghere preìderu. Aristanis, Tàtari, su Brasile e s’Ùmbria sunt sas tapas in antis de su primu cunflitu mundiale, cando fiat capellanu de sa Brigata tataresa connoschende finamentas sa presonia.
In sas dies de sa derrota de Caporetto – pro nàrrere – sos sordados tedescos lu pigheint in tretos de Codroipo e nche lu giugheint a sos campos de Scwarmstadt e Callelager pro nche l’internare a pustis in unu cunventu frantziscanu in sa Germània meridionale.
Parte de importu de su libru est sa chi pertocat s’ocupatzione nazista de s’Itàlia cando chi, santuarista in sa basìlica de Santu Frantziscu in Assisi, traballeit pro sarvare sa vida de chentinas de ebreos. De onni manera, a diferèntzia de àteros protagonistas de custa istòria, a Padre Michele Todde non nche l’ant galu postu in s’elencu de sos “Giustos intre sas Natziones”, s’onorefitzèntzia chi su Yad Vashem, est a nàrrere s’Ente natzionale israeliani pro sa Memòria de sa Shoah, intregat a sos chi non sunt ebreos ma chi ant gherradu contra a cussu genotzìdiu.
Sa punna de sos autores est chi gràtzias a custu libru non si connoscat ebbia s’istòria de padre Todde, ma chi su contu matessi potzat serbire pro chi in su giardinu de sos giustos de Gerusalemme pòngiant un’àrbore cun su nùmene suo.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
