Su comunu de Ussassa, paris cun su de Seui, ant pigadu parte a su bandu natzionale “Bici in comune”, cun su progetu intercomunale “De sa bidda a su padenti”. Sa punna est de promòvere sa bitzicleta comente trastu de mobilidade sustenìbile pro megiorare sa calidade de sa vida de is tzitades e promòvere istiles de vida sanos e ativos.
Cun su progetu “De sa bidda a su padenti” is duos comunus intre Ogiastra e Barbàgia, bolent fàghere a manera chi sa bitzicleta siat imperada de prus in intro de is biddas, cando su tretu de fàghere est pagu, essende chi giuat a sa salude de sa persona e a su logu, ma fintzas pro fàghere isport. In prus, su progetu punnat a s’avaloramentu de su territòriu, acontzende caminos in mesu a su padente, adatende·ddos a is bitzicletas, a manera chi totus, mannos e minores, protzant gosare in seguresa e in modu sanu de sa bellesa de su sartu e de su monte. Una borta chi su progetu at a èssere portadu a compimentu, tando s’ant a cuncordare atividades e eventos tziclìsticos, addòbios, garas, escrusiones e àteras initziativas puru.
Su tretu interessadu dae su progetu est su chi andat dae Monti Arcuerì (Seui) a Monti Serafinu (Ussassa), unu logu de grandu valore naturalìsticu, giai connotu dae escursionistas e amantiosos de mountanebike, acanta sunt giai presentes àndalas e caminos de valorizare e megiorare.
Su bandu “Bici in Comunu”, est promòvidu dae su Ministeru pro s’Isport e is Giòvanos, cun su sustennu de su Dipartimentu pro s’Isport, in collaboratzione cun s’Anci (Assòtziu Natzionale Comunos Italianos). In totu sunt 1952 is Comunos italianos chi ant presentadu dimanda de partetzipatzione in sa Prataforma de Isport e Salude. Su progetu previdet una dotatzione finantziària neta de 12.600.000 èuros e si movet in intro de bator lìneas progetuales: sa difusione de sa cultura tziclìstica pro favorèssere s’adotzione de sa bitzicleta comente alternativa ecològica a is mèdios de trasportu traditzionales, s’isvilupu e sa ricualificatzione de is infrastruturas tziclàbiles, sa promotzione de su tzicloturismu pro sa valorizatzione de su patrimòniu culturale e paisagìsticu, s’organizatzione de eventos, fintzas no agonìsticos, cun sa partetzipatzione ativa de is tzitadinos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
