A pustis de àere conchistadu su tìtulu de Àrbore italianu de su 2023, pighende·si prus votos de s’abete de sos brigantes de Chieti, de sa secuoia gemella de Frorèntzia e de su làrighe de Boltzanu, s’ogiastru de Luras est in cherta de àteros pòdios. Dae sa prima die a sa de 22 de freàrgiu est possìbile a votare s’àrbore sardu in sa cumpetitzione European tree of the year 2024 chi est interessende 15 istados.
In pare cun s’ogiastru lurisincu b’at difatis: unu chercu islovacu “chi ammentat sa famìlia Pálffy”; una camèlia portughesa; su chercu lètone Kaņepju; s’àrbore de sos patriarcas de sa Lituània; un’àrbore tzecu de pira; su sidru de su collègiu belga Sainte-Marie; una murichessa de su parcu natzionale de Krka in Croàtzia; su fau polacu “su coro de sa corte”; sa tija olandesa “Maria Lime”; unu chercu ucrainu “Millennium”; s’ispagnolu “La Vega”; su èstone “Virilalt”; su fau pranghende de Bayeux in Frantza; su castàngiu durche gallesu de Wrexham.
S’ogiastru millenàriu de Luras, in tretos logudoresos de Gaddura, est un’ispantu de sa natura chi ammajat a sos chi bi colant afaca pro more de sa galania e de s’imponèntzia suas. In Sardigna custu àrbore – chi li narant fintzas su Patriarca – tenet un’edade chi bàntzigat intre sos 3 e sos 4mìgia annos. S’istrutura mustrat totu sa resistèntzia sua e sa continuidade de s’istòria in custa terra, dae sa chi no amus connotu a sa de oe.
E in sa de oe custu àrbore tenet idea de si fàghere connòschere in totu Europa pro more de sas caraterìsticas suas: tzircunferèntzia de 11,6 metros e artària de 14. Apompiende·lu dae cada ala bidimus unu testimòngiu de su tempus cun raighinas bene prantadas a terra e ratos carignende sas àeras; un’iscultura aprontada dae s’intrèveru de istajones chi si sunt acaradas in custos millènnios e chi galu l’ant a fàghere finamentas cando nois non b’amus a èssere.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
