Arribat a sa de chimbe editziones su Prèmiu Centottanta, cuncursu pro registas a s’esòrdiu. Dae ocannu su cuncursu est promòvidu dae sa Sotziedade Umanitària – Cineteca Sarda de Casteddu chi, a pustis de èssere istada collaboradore de su prèmiu, immoe contivìgiat s’editzione noa.
Sa punna de s’initziativa, nàschida in su 2017 dae un’idea de s’assòtziu Moviementu, est sa de contribuire a s’isvilupu de un’indùstria de s’audiovisivu sustenìbile in Sardigna, donende tretu puru a chie no at mai fatu unu film. S’intentu est duncas de avalorare, promòvere e sustentare cussos chi cherent cumentzare su traballu in su tzìnema pro mesu de un’iscàmbiu cun professionistas de su setore.
Sunt belle dughentos is film chi ant leadu parte a sa de bator editziones pretzedentes: òperas lìberas, originales e indipendentes chi andant dae su gènere documentàriu a su de fintzione, pro arribbare a s’isperimentatzione cun màgines in movimentu a metade tra tzìnema e arte cuntemporànea. S’ùnicu lìmite impostu a s’espressione artìstica in custu cuncursu est ca is film ant a dèpere durare chentu otanta segundos.
Tres minutos, duncas, pro si pòdere agiudicare is prèmios postos a disponimentu dae is istitutziones e dae is collaboradores: su prèmiu Cineteca Sarda e su prèmiu Moviementu de 1000 èuros cadaunu; sa possibilidade de traballare a unu fundu pretziosu de archìviu pro su prèmiu Cineteca Sarda Working; su prèmiu EjaTv, de 300 èuros; sa possibilidade de isvilupare unu progetu artìsticu pro su prèmiu Sardegna Teatro; unu cursu de formatzione pro su prèmiu Notorius; s’agiudu pro una produtzione audiovisiva pro su Prèmiu Mommotty; unu perìodu de imparu pro su Prèmiu BurnOut Films.
[Foto de Giulia Camba dae sa pàgina Facebook de su prèmiu 180]
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
