Martis su 2 maju, in su Trento Film Fèstival, est istadu presentadu in anteprima, sa pellìcula “L’Ombra del Fuoco – S’umbra ‘e su fogu” de su regista casteddaju Enrico Pau. Su film, a s’esòrdiu suo, at fintzas retzidu su prèmiu Museo della Scienza di Trento, intregadu a s’òpera chi contat mègius su raportu intre s’òmine e su mundu naturale in s’època de s’Antropocene.
A pustis de su fogu mannu chi aiat bisestradu su Montiferru in su mese de trìulas de su 2021, un’iscuadra de giòvanos at documentadu sos dannos causadus dae s’intzèndiu, ascurtadu sas boghes de sos testimòngios, intesu sos càntigos de sos poetas, e mescamente at bidu de persone su meràculu de sa naturalesa chi est torrada a nàschere dae sa chighina.
“Su documentàriu meu lu conto comente una manera de poderare, de aguantare a una cosa chi non potzo e non mi bògio rassignare – at naradu su regista Enrico Pau – sa tontesa, sa tzurpia de s’òmine, in custu momentu de sa presèntzia dannàrgia nostra in custu pianeta”.
Intro sos ritos de sa Chida Santa, Pau at iscobertu sa bellesa ispantosa de sos càntigos, comente sos de su Coro de Cùllieri) chi tenent una parte de importu in su documentàriu, finas dae s’istiu cando ant cantadu in mesu a su padente brusiadu sos versos de unu sonetu de unu poeta sardu. Aici su film est divènnidu unu diàriu de su chi est acontèssidu, intre sas imàgines e sas intervistas, sos contados e su prantu de chie in mesu de sa fraca at pèrdidu totu su chi teniat, peri sa memòria de unu tempus coladu distrùidu dae su fogu e chi non podet torrare.
S’òpera est prodùida dae Lucrezia Degortes pro s’assòtziu culturale Arvèschida, co-produtore Isre – Istitutu Superiore Regionale Etnogràficu, produtores assotziados Antioco Floris pro s’Universidade de sos Istùdios de Casteddu – Laùrea magistrale in Produtzione Multimediale, Dipartimentu de Lìteras, limbas e benes culturales e Hortus Botanicus Karalitanus, e si serbit de sa consulèntzia iscientìfica de Gianluigi Bacchetta. Sos autores de sos testos sunt Enrico Pau, Ettore Cannas, Alberto Capitta, Alessandro De Roma e Mauro Tetti, imbetzes sa tradutzione de sos testos in sardu e sa boghe chi contat est de Giuseppe “Bosco” Falchi.
