Sighi∙nos

Salude, ite ses chirchende?

Atualidade

Sa Sardigna e sos tzentenàrios: sa Tv tedesca Arte in Ogiastra pro unu documentàriu subra sa longevidade

In custas dies, un’iscuadra de sa televisione tedesca ARTE s’agatat in Ogiastra pro registrare unu documentàriu subra de s’imbetzamentu e sa longevidade. ARTE, acrònimu de Association Relativas à sa Télévision Européenne (Assòtziu Relativu a sa Televisione Europea), est una rete televisiva francu-tedesca cun un’apentu europeu e de servìtziu pùblicu, fundada in su 1992 a pustis de unu tratadu intre s’Istadu frantzesu e sos Länder tedescos.

Su giornalista Markus Tobias Henssler e sa troupe sua s’ant a cuntzentrare subra sa chirca de sos betzos dae 85 a 100 annos e prus de sas biddas de Àrthana, Biddamanna Strisàili e Foghesu, esplorende sas càusas e sos segretos de sa longevidade de sos sèneghes chi bivent in sas gosi  naradas “zonas blu” de su mundu, in ue s’isperu de vida est meda prus artu de sa mèdia mundiale. Sos giornalistas ant a sighire sos betzos in sa vida fitiana issoro, intervistendeddos  mentras si pigant unu cafè in su tzilleri cun sos amigos, durante sas bìsitas mèdicas ambulatoriales, in su traballu in sos campos o mentras atendent sos animales. Su documentàriu at a èssere trasmìtidu custu istiu.

Ant a èssere intervistados sos mèigos de famìlia chi ant sighidu sos tzentenàrios, comente a su dotore Raffaele Sestu de Àrthana, ma fintzas sos istudiosos de su CNR de sa Progenia de Lanusè, su professore biòlogu Edoardo Fiorillo, e su professore assotziadu de Sièntzia de sa Nutritzione acanta s’Universidade de Tàtari, su dot. Gianni Pes.

Ma cale est su segretu de sa longevidade? A traessu de vàrios istùdios subra sas abitùdines, s’alimentatzione e  s’istile de vida de custos sèneghes, in su documentàriu, s’at a chircare de iscobèrrere su chi acumonat sos tzentenàrios ogiastrinos. Nd’at a essire unu curtzumetràgiu meravigiosu chi no at a chistionare ebbia comente ant fatu  lòmperede custos betzos a nche durare unu sèculu de vida, ma finas de s’ambiente sotziale e familiare acanta ant bìvidu.

Su traballu est realizadu gràtzias a su sustennu logìsticu e organizativu de sa Sotziedade Suia SNC e de sas Pro loco de Àrthana, Biddamanna e Foghesu.


Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018

De lèghere

Atualidade

«Emergèntzias e oportunidades» in sa mirada sua. Ma sos amministradores unidos sufrint sos sèberos de Casteddu e de Roma, in ue sunt partzidos

Isport

Ruju-biaitos in foras de sos play off

Isport

Su campione de s’ìpica sarda e italiana teniat 64 annos Su fantinu de Lanusè, classe 1960, si nch’est mortu giòbia su 23 de maju, pro...

Atualidade

Istrumada atzessìbile e segura comente diritu umanu fundamentale. Initziativa de sos tzitadinos europeos. Sa campagna “My Voice, My Choice” dat a is tzitadinos europeos...