S’imponimentu de sos dàtzios de su 20% a sos produtos europeos dae banda de su presidente Donald Trump est ponende in pensamentu fintzas a sos produtores sardos, mescamente a sos de su setore caseàriu, dae semper acapiados a su mercadu americanu, chi rapresentat una cuota importante de sas bèndidas.
Segundu un’anàlisi de sa CNA Sardegna, in su 2024 su mercadu americanu at surbidu prus de su 52% de sos produtos agroalimentares de s’ìsula, una cuntzentratzione gosi arta chi faghet cumprèndere comente su cumpartu sardu siat sugetu, e duncas vulneràbile, a sas polìticas cummertziales protetzionìsticas de Trump.
Fintzas Giommaria Pinna, de su caseifìtziu Pinna de Thiesi, intervistadu de La Nuova Sardegna, at naradu chi sas conseguèntzias de sos dàtzios s’ant a intèndere in su prètziu de su casu, chi at a colare dae 12 èuros de oe a 14,50 èuros a su chilu, fintzas a càusa s’indebilimentu de su dòllaru. Mancari gasi, Pinna at naradu chi in custu momentu est a non tìmere e a non fuire, essende chi su casu de berbeghe romanu – chi sos americanos impreant pro dare sabore a sa patata frigia– est unu produtu apretziadu meda e non fàtzile a lu remplassare. Est a bìdere si sos clientes americanos ant a iscarrigare s’aumentu subra sos consumadores issoro o ant a pretèndere un’iscontu dae sos produtores sardos e italianos.
Espertos e operadores de su setore cunsìgiant diversas istrategias pro reagire cun firmesa a sos provedimentos trumpianos. Una de custas solutziones est sa diversificatzione de sos mercados, leende s’esèmpiu profetosu de s’indùstria de su whiskey irlandesu, chi a paradu fronte a sos deretos doganales de Istados Unidos aumentende sas esportatziones cara a Europa, Àfrica, Àsia e Austràlia, reduende duncas sa dipendèntzia dae sos Istados Unidos.
Fintzas sas economias emergentes, comente Mèdiu Oriente, Àfrica e Àsia, diant pòdere èssere un’alternativa, est pro cussu chi medas impresas italianas sunt chirchende de fraigare relatziones cummertziales prus istàbiles cun custos mercados.
In fines, segundu sa Coldiretti, est pretzisu chi sas istitutziones puru fatzant sa parte issoro: serbit difatis un’atzione diplomàtica forte a livellu europeu pro evitare una “gherra” cummertziale e pro amparare sas fileras italianas e sardas.
Oe in Sardigna belle 250 tratores e veturas ant isfiladu in s’istatale 131: allevadores e massajos, giai dannificados dae su firmu de sos pagamentos de sos prèmios comunitàrios, timent puru chi siant issos a pagare sos dàtzios americanos e meletzant de ocupare sos aeroportos si no ant a lòmpere rispostas dae sas istitutziones regionales e istatales.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
