Dae su 2 a su 7 de su mese de nadale in Casteddu s’at a tènnere su Babel film festival, cuncursu internatzionale de registas chi faghent pellìculas in sas limbas de sas minorìas de su mundu. No isceti tzinema, a Sa Manifatura b’at puru tretu pro s’arte fotografica
“In Turchia nois curdos semus comente a pantamas, no esistimus. Istamus in una regione chi non nos lassat espressare sa cultura nostra in sa limba nostra. Istamus in sa terra nostra comente umbras”.
Sunt sas paraulas de su fotografu Murat Yazar chi durante su Babel film festival, destinadu a sas limbas de minorìas de su mundu in Casteddu finas a su 7 de su mese de nadale, in Sa Manifatura esponet sa mustra ‘Le ombre del Kurdistan’.
Naschidu e paschidu in unu bidditzolu acanta de sa tzitade de Urfa, su fotografu at dépidu a mala gana imparare sa limba turca pro sighire a istudiare: “In Turchia istant 18 milliones de Curdos. Pro annos meda s’impreu de sa limba curda dd’aiant proibidu, comente finas de pòdere pònnere su numene de origine curda a figios nostros. Custu est mudadu dae chimbe annos a como, ma galu oe in sas iscolas su curdu est vedadu”, contat Murat Yazar.
Cun sas fotografias de escenas de su fitianu, Murat contat sa cultura de su populu suo chi istat in Turchia. Est sa prima parte de unu progetu galu prus mannu. Su fotògrafu difatis tenet che punna cussa de sighire a tirare immagines in teras leadas ue b’ant Curdos, gasi comente sa Siria, s’Iran e s’Irac. Immoe su populu curdu, a pustis aere contribuidu a sa gherra contra a s’Isis, est bivende unu momentu difitzile meda pro mori de sa polìtica de espansione de Turchia ghiada dae Recep Tayyip Erdoğan.
A suta una foto de sa mustra
