Sa Giunta regionale at aprovadu sa delìbera in contu de istandard ortogràficos. No, non semus faeddende de su sardu, sa limba nostra chi la sunt bantzighende intre sa Lsc impreada fintzas in custos artìculos, su repertòriu grafemàticu chi tocat a sighire pro sas tzertificatziones e sa Consulta pro sa norma noa chi mai ant cunvocadu mancari l’aiant dèvidu fàghere intro de 45 dies dae sa promulgatzione de sa lege 22 de su 2018.
Semus faeddende de su gadduresu, de su tataresu e de su tabarchinu, comente narat sa delìbera 11 de su 30 de abrile.
Sa faina de su gadduresu, chi agatamus in s’allegadu 1, l’ant presentada su Comune de Terranoa, s’Istitutu de sas tziviltades de su mare de Santu Diadoru e sas tres Uniones de sos Comunes de Gaddura. A su progetu b’ant traballadu dotzentes, giornalistas e autores rapresentantes de sa realidade culturale de su logu, coordinados a comintzu dae su glotòlogu Fiorenzo Toso de s’Universidade de Tàtari e a pustis dae su glotòlogu de s’Universidade de Siena Simone Pisano. Su standard aprovadu est una ghia fintzas pro sas variedades casteddanesa (transitzione cun su turritanu) e isulana (de Madalena). Su standard tataresu (o turritanu, allegadu 2) est connotu oramai dae belle un’annu gràtzias a su traballu de s’istitutu Bellieni, de sos Professores Maurizio Virdis, Mario Marras e Riccardo Mura. Su standard de su tabarchinu (allegadu 3) chi movet dae sa grammàtica de Fiorenzo Toso.
Totu sos istandard, ant pretzisadu dae Casteddu, «ant a èssere adotados pro sa comunicatzione iscrita in essida dae sa Regione, pro s’impreu in intro de sos progetos finantziados dae sa Regione matessi e pro sas verìficas iscritas pro s’atestatzione de sas connoschèntzias linguìsticas comente prevìdidu dae sa lege regionale 22/2018 art.9 comma 6». Pro su sardu paret imbetzes chi semus torrados a dae in segus sende chi b’at libertade màssima, pro non nàrrere àteru.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
