Marco Buttu, ingenieri eletrònicu e chircadore de Gavoi, a pustis de tres missiones isientìficas in sa base Concordia a 3.200 metros, est como impinnadu in una filera de presentadas in Itàlia e in Europa pro promòvere su libru nou cosa sua a tìtulu “Marte bianco. Nel cuore dell’Antartide. Un anno ai confini della vita” (Edizioni LSWR). A pustis de sas tapas de Arbedo-Castione in Isvìtzera e de Alba (CN), eris fiat in Francuforte in su Meno (DE), acasagiadu dae su tzìrculu sardu “Maria Carta”.
Buttu, chircadore de astrofìsica in s’Istitutu Natzionale de Astrofìsica, 47 annos, est connotu meda fintzas gràtzias a sos vìdeos suos de Instagram, divènnidos virales cun miliones de visualizatziones. In su libru “Marte Bianco” contat s’esperièntzia in sa base italu-frantzesa Concordia, situada in s’Altura Antàrtica, unu de sos logos prus estremos e inospitales de su pianeta.
S’Altura Antàrtica est caraterizada dae temperaduras chi podent lòmpere fintzas a suta de sos -80 °C, un’àera meda sica e sena de vida vegetale e animale. In custu ambiente estremu, Buttu at coladu un’annu partetzipende a chircas sientìficas e bivende in cunditziones de isulamentu, comente chi esseret in un’àteru pianeta comente Marte. Dae inoghe su sèberu de su tìtulu. Custa esperièntzia, compidada dae s’Agèntzia Ispatziale Europea, at permìtidu de istudiare s’adatamentu umanu in ambientes extraterrestres.
In s’addòbiu de eris in Francuforte, patrotzinadu dae sa Regione Autònoma de sa Sardigna e dae su Consoladu Italianu, Marco Buttu at presentadu su libru suo dae in antis a unu pùblicu interessadu e atentu. Intre sos reladores de sa serada bi fiant Alessandro Ercolani, giai capu de su tzentru ispatziale europeu, su vitze Cònsole Michele Santoriello (Responsàbile Ufìtziu Culturale), in prus sa presidenta Tiziana Deidda e sa vitzepresidenta Cinzia Marongiu de su Tzìrculu sardu “Maria Carta”, chi at acasagiadu e organizadu s’eventu. Buttu s’at a firmare in tzitade tedesca tres dies e at a bisitare fintzas s’iscola italiana bilìngue BILIS sighende gasi su diàlogu intre sièntzia, cultura e levas noas.
In sas presentadas suas s’istudiosu sardu cumpartzit anèddotos de sa vida fitiana in sa base Concordia, afrontende temas comente sa gestione de s’acorru, sos disafios psicològicos e sas dinàmicas de cunvivèntzia in un’ambiente estremu. In sa serada de eris Buttu at contadu comente de sas trèighi persones chi formaiant s’echipàgiu de sa Concordia, petzi sa metade fiant iscientziados; sos àteros fiant figuras fundamentales comente unu coghineri, un’idràulicu e unu mecànicu. “In intro de sa base, custas figuras sunt importantes meda pro sa subravivèntzia! Cando unu ischit fàghere bene su traballu suo” at sutaliniadu s’autore, “sas possibilidades in sa vida non mancant, in cale si siat campu”. In prus de Buttu in sa base antàrtica bi fiant fintzas àteros duos sardos, Mario Lecca de Austis (chicadore) e Manuel Mele de Thiniscole (tècnicu ispetzializadu).
Su libru est a disponimentu siat in sas librerias, siat in sas butegas eletrònicas. Pro chi esseret interessadu a adobiare s’autore, inoghe agatades sas datas de sas presentadas imbenientes.
