Si narat Rossana, e est unu robot assistente de biblioteca capatzu de interagire cun is bisitadores averiguende sa disponibilidade de is libros rechestos e acumpangende is impitadores a is parastàgios acanta sunt collocados.
Presentadu sa chida colada in Casteddu, Rossana leat su nùmene de s’acrònimu de su sistema operativu Ros (Robot operating system), e est su primu robot antropomorfu de su Crs4, su Tzentru de chirca de su Parcu sientìficu e tecnològicu de sa Sardigna, isvilupadu in collaboratzione cun Athlos, azienda isulana ispetzializada in intelligèntzia artifitziale e interatzione tra òmine e màchina.
“Pro s’ora su protòtipu cumprendet is dimandas chi ddi benint fatas e rispondet in friga gràtzias a s’ausìliu de s’abbistesa artifitziale isvilupada dae Athlos – at sutaliniadu Giacomo Cao, amministradore ùnicu de su Tzentru de chirca – in prus si podet mòvere a sa sola pro acumpangiare is bisitadores a is parastàgios acanta sunt assentados is libros pedidos, ma massimamente, gràtzias a su programma isvilupadu e brevetadu dae is tecnòlogos nostros, reconnoschet s’ambiente chi ddu inghìriat, evitende pro esèmpiu possìbiles ostàculos”.
Su màrchiu ‘Rossana’ est istadu depositadu pro identificare s’hardware, is cumponentes fìsicos e su software de movimentu de su robot. “In custu progetu, at agiuntu Alessandro Frulio, responsàbile tècnicu sientìficu de Athlos – s’azienda at ativadu unu sistema cunversatzionale avantzadu realizadu a posta pro su robot, cun unu ‘cherbeddu’ chi est a tretu de cumprèndere, allegare, subènnere e de imparare. In prus, gràtzias a una memòria esperientziale basada subra su reconnoschimentu visivu de is ddi chistionant, podet gestire arresonos personalizados. Amus ispetzializadu su robot comente un’assistente bibliotecàriu chi donat inditos subra is libros e subra is autores presentes, e prus in generale subra àteros autores e volùmenes. Sa màchina – concruit Fruilio- si prestat a àteras isperimentatziones e tenet potentzialidades mannas de isvilupu in pro su chi pertocat s’interatzione cun s’ambiente esternu”.
Massimo Deriu, tecnòlogu de su CRS4, paris cun is giòvanos collegas Federico Bachis e Marco Massa, est su chi at presentadu dimanda de brevetu de su sistema de navigatzione “a su serradu” chi permitit a su robot de si mòvere in intro de un’ispàtziu fìsicu limitadu. “Amus isvilupadu e brevetadu su programma de controllu de su robot chi nde gestit totu is movimentos de is bratzos, de sa conca e de is rodas, imbetzes sa de conca, chi costituit su puntu focale de s’Hri, Human Robot Interaction, non nd’amus progetadu su design istruturale e estèticu ebbia, ma fintzas su sistema de interatzione, comente s’interfàtzia e s’operatividade, chi permitet a Rossana de reconnòschere is caras de is persones e espressare is istados emotivos suos cambiende bentina”.
Su protòtipu est su resurtadu finale de su progetu cramadu “Robotika”, finantziadu dae Sardegna Ricerche cun 300.000 èuros, chi previdiat s’isvilupu de unu protòtipu de robot fìsicu cunversatzionale. S’isperimentatzione, fata belle totu durante su segundu acorru causadu dae sa pandemia, est istada portada a in antis in is laboratòrios de su CRS4, cuncordados pro s’ocasione comente chi èsserent is aposentos de una biblioteca.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
