Su 6 de ghennàrgiu sa Crèsia Catòlica tzèlebrat s’Epifania, faeddu chi benit dae su gregu ἐπιφάνεια, est a nàrrere sa die chi is Tres Res aiant bisitadu a Gesùs, chi gosi aiat manifestadu sa divinidade fìsica de Deus a is òmines. Però, custa die oe est nòdida mescamente pro sa festa de sa Befana, una traditzione raighinada mescamente in su tzentru Itàlia. Nointames sa figura de sa betza cun s’iscova chi donat regalos o carbone siat assotziada a s’Itàlia, in veridade tenet raighinas fungudas finas in àteras culturas, comente sa Babushka de sa traditzione russa.
In Sardigna, ue s’Epifania est fortzis sa festa prus pagu intesa, finas a sa primu metade de su sèculu coladu sa Befana non fiat connota. S’identificatzione intre s’Epifania e sa betzitedda cun s’iscova in s’ìsula est unu fenòmenu bastante reghente, acapiadu a su perìodu fascista. Su règimene, bidu s’importu chi custa traditzione aiat pro su pòpulu, l’aiat impreada comente trastu de propaganda, presentende·dda comente un’elementu de “romanizatzione” de su paisu. In su 1928, difatis, fiat istada istituida sa “Befana fascista”, posca torrada a numenare “Befana del Duce” pro promòvere su cultu de sa personalidade de Benito Mussolini. Oe, s’assòtziu intre s’Epifania e sa Befana in Sardigna, comente in Itàlia, est prus ligada a sa cultura consumìstica moderna.
In sa traditzione sarda, s’Epifania est mutida sa Pasca de is Tres Res o Pasca de Istrina, in onore de is tres Res chi aiant istrinadu a Gesùs cun oro, intzensu e mirra. In s’Ìsula sa devotzione a is Tres Res est gasi forte chi sunt istados tramandados medas càntigos traditzionales in diversas biddas.
Nointames, comente afirmaiat Francesco Alziator in su libru suo “La città del sole”, s’Epifania de is Tres Res, comente sa Befana etotu, est una usàntzias bènnida dae foras, de orìgine ibèrica, chi at achiridu significadu cun s’importatzione de unas cantas traditziones catalanas. Sa “fiesta de los tres Reyes Magos”, in Ispagna ma mescamente in Bartzellona est intesa meda. In custa tzitade, pro s’Epifania, si costumat a cuncordare su “roscón de reyes”, unu durche prenu de crema e cugugiadu de tzùcaru o frùtora pabassada.
Mancari sa festividade de su 6 ghennàrgiu esseret cunsiderada una die nòdida giai in s’Evu Mesanu, s’Epifania fiat semper prus pagu importante de “Sa Pasca Manna”, est a nàrrere sa Pasca de Resurretzione, sa festa cristiana prus de importu in Sardigna. In sa “Carta de Logu” s’Epifania benit mutida “Pasca nunçi” (Pascha annuntiationis) ca in prus de s’annùntziu de sa nàschida de Gesùs a su mundu, in is crèsias, su 6 de ghennàrgiu si costumaiat a annuntziare is dies nòdidas non vinculadas a una die pretzisa, comente est sa Pasca Manna etotu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
