Su Cummissàriu istraordinàriu pro su Covid-19 Francesco Paolo Figliuolo l’aiat annuntziadu: “Su mese de làmpadas at a èssere su de sa bortada manna”. E gasi in Sardigna sunt arribados belle 400 mìgia vatzinos, 100 mìgia a sa chida tra Pfizer e Moderna.
De su primu vatzinu, segundu sos datos de s’assessoradu regionale de sa Sanidade, oe sunt istadas intregadas 10.530 doses e pro su 10 de su mese de làmpadas nd’ant a arribbare 86 mìgia, sighidas dae àteras 9.700 de Moderna intro su 14 de custu emse etotu. Ant a lòmpere a s’Ìsula fintzas iscortas de Janssen e de Astrazeneca, ma in cantidades prus piticas.
E dae chenàbura su 4 de làmpadas, in Sardigna est aumentadu su nùmeru de sas persones chi s’ant a pòdere vatzinare: difatis immoe podent racumandare su vatzinu sos tzitadinos tra sos 16 e sos 39 annos. In su mentres, in Sardigna sa curva de sos contàgios de Covid-19 abarrat bassa. Su tassu de cuntàgiu s’est ampuladu a su 2,7%, ma est petzi s’efetu de pagos nùmeru de tampones. E sunt cuntentos meda sos bar, sos albergos e sos agriturismos. Ma como est a fàghere sos contos cun sas limitatziones de s’ordinàntzia regionale, chi imponet a sos meres de un’atividade 20 metros cubos de àera a persone. Pro su diretore de Cia Sardegna, Alessandro Vacca, est “unu provedimentu incumprensìbile e ingiustu”.
S’ordinàntzia est a su tzentru de un’interrogatzione de su Pd. “Nos isetamus chi su guvernadore acrarat cales siant sos istùdios sientìficos a sa base de custa detzisione”, at ispiegadu su consigieri Piero Comandini. “Diat èssere difatis mègius – sutalìniat s’esponente de s’opositzione – agatare disponimentos simpres in matèria sanitària, comente s’istesiamentu personale e s’impreu de sas maschereddas”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
