Finas a su 2 de su mese de santandria in Casteddu apuntamentos a su tzìnema cun sa rassigna ‘Nosu e is atrus’ organizada dae s’assòtziu culturale Babel.
Sa segunda editzione de sa rassigna tzinematogràfica previdet chimbe dies de projetzione chi ant a dare sa possibilidade de castiare, faeddende cun sos registas, pellìculas curtzas e longu-metràgios in sas limbas minoritàrias. S’obietivu de sos organizadores est su de arrichire s’oferta culturale de sa tzitade e promòvere traballos realizados siat in Casteddu chi in su territòriu regionale e internatzionale ponende a cunfrontu film chi contant esperièntzias de vida ligadas a sa tzitade, a sos personàgios e a s’istòria sua (Nosu) cun unas àteras pellìculas de sa Sardigna e de su mundu (is Atrus).
A pustis de sa prima die de projetziones dedicada a sas iscolas chi s’est tenta su 25 de maju, s’at a sighire chenàbura 10 de làmpadas 2022 in su Teatru Dante de su tzentru de agregatzione sotziale Exmè de Pirri cun bator film chi contant sa tzitade de Casteddu. “12 aprile” (Antonello Deidda, 2021) ponet a pare duas dies importantes de sa vida de su cabu-logu sardu a tesu 50 annos: su 12 abrile 1970, cando su Casteddu aiat bintu s’iscudetu e su 12 abrile 2020 chi signat s’inghitzu de sa pandemia de su virus Corona. “Santamaria” (Andrea Deidda, 2021) imbetzes contat s’istòria bera de unu giòvanu de Seui chi in sos annos sessanta s’ammàniat pro su primu addòbiu de sa carriera sua. “L’uomo del mercato” (Paola Cireddu, 2020) faeddat subra de s’istòria de Mario, un’òmine chi collit sas cassetas de su mercadu de Casteddu pro las torrare a bèndere pro pagu dinari. “Twilight” (Paolo Carboni, 2020), docu-clip musicale de su branu de su rocker cagliaritano Joe Perrino contat sa Casteddu de sos annos ’80.
Replica a pustis de s’istiu mèrcuris 19 de santugaine ma custa borta in su tzìnema Greenwich ue su mèrcuris sutzessivu 26 de santugaine b’at a èssere sa projetzione de su film “Ndoto ya Samira – Su Bisu De Samyra” (Nino Tropiano, 2020), prèmiu Maestrale comente a su mègius longu-metràgiu a su Babel Film Fèstival 2021. Su regista pulliesu contat (in limba swaili) un’istòria de emantzipatzione feminile chi bidet protagonista Samira, una giòvana originària de Nungwi, unu bidditzolu de piscadores in Zanzibar.
Su 2 de santandria 2022 ant a bènnere projetados sas mègius pellìculas de su Babel film fèstival 2021: ‘Mira sa dì’ (Andrea Cannas, 2021) contat un’istòria bera de amore e de giustìtzia ambientada in Mòguru, in su 1930. Malu Fadau (Matteo Incollu, 2020), est unu fantasy thriller ambientadu in Baunei in su 1942. S’ùrtimu curtzu in programa at a èssere Inferru (Daniele Atzeni, 2019). A.D
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
