Finas su Comunu de Santu Pedru, in sa tzitade Metropolitana de Casteddu, est abarradu sena mèigu de base.
A ddu narrere a dolu mannu pro unu servìtziu sanitàriu de importu chi benit a mancare est sa sindaca de sa bidda, Marina Madeddu, chi at publicadu in Facebook un’avisu narende a sos abitantes de si presentare a sa guàrdia mèdica non isceti pro sas emergèntzias ma puru pro pigare meighinas e pedire atzertamentos.
“Est una noa chi non dia àere mai chertu dare: a su mèigu chi aiat dadu disponibilidade pro trabballare in sa sede bòida nostra no est istadu cunferidu s’incàrrigu ca isse fiat giai pensionadu e duncas incumpatìbile” at ispiegadu. In custas sunt semos traballende a totu sos livellos pro agatare una solutzione non fàtzile pro ite a sa base b’at sa mancàntzia de mèigos”.
Segundu sa sindaca una solutzione “tampone” diat èssere sa deroga, gasi comente giai istadu cuntzèdidu durante sa pandemia. “E custu so pedende cun fortza – narat – in su mentres, sa Asl, est chirchende sa disponibilidade de sos mèigos de guàrdia mèdica pro ativare unu servìtziu dedicadu. Finas a como peruna adesione”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
