Un’importante bidrera internatzionale pro su museu sardu: in sa matessi setzione fintzas Bona de Mandiargues, un’àtera artista manna acapiada a s’istòria de su Museu Nivola.
Su Museu Nivola est brontu a festare unu momentu de importu mannu pro s’istòria sua: sa partetzipatzione de Costantino Nivola a sa Biennale de Venètzia 2024. Si tratat de una noa de istraordinària, cunsiderende chi s’artista sardu no at mai partetzipadu a sa manifestatzione venetziana.
Connotu pro sa fama internatzionale sua comente iscultore pro s’architetura,Nivola aiat retzidu s’invitu a partetzipare a sa Biennale de Venètzia in su 1947, ma aiat refudadu cun modèstia, narende de bòllere abetare su momentu giustu. Oe, a prus de 25 annos a pustis dae sa morte, s’òpera sua, at a retzire in fines su reconnoschimentu chi meresset. Difatis s’iscultore de Orane est istadu inclùdidu in sa mustra printzipale de sa de 60 editziones de sa Biennale, intitulada “Stranieri ovunque / Foreigners everywhere”, contivigiada dae Adriano Pedrosa.
Un’àteru nùmene acapiadu a s’istòria de su Museu Nivola chi at a èssere presente in sa matessi setzione est su de Bona de Mandiargues, artista surrealista torrada a iscobèrrere gràtzias a sa mustra reghente “Bona de Mandiargues. Rifare il mondo”, organizada in collaboratzione cun su programa “Ars/Arte Condivisa” de sa Fundatzione de Sardigna.
Sa presèntzia de su Museu Nivola in sa Biennale de Venètzia 2024 rapresentat pro su museu sardu unu reconnoschimentu importante a su traballu sena pasu suo pro promòvere e preservare sa lassa de custos duos artistas istraordinàrios.
Sa partetzipatzione de Nivola e Mandiargues a custu eventu, signat unu momentu significativu siat pro su museu oranesu, siat pro sa Sardigna, ma fintzas pro su panorama artìsticu internatzionale, oferende un’oportunidade ùnica a su pùblicu de connòschere s’òpera de duos mastros chi ant lassadu un’arrastu significativu in s’istòria de s’arte de su sèculu XX.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
