Andrea Mura, su navigadore casteddaju, cun sa barca sua Vento di Sardegna, est partetzipende a sa Global Solo Challenge, su giru de su mundu a vela a sa sola, sena firmadas e sena perunu agiudu. Su skipper sardu s’agatat tra su 6° parallelu e su 32° meridianu cun sa prua puntada a is Azorras. Mancari totu is dificultades, comente sa randa isdurrèndida e su timone in “straortza”, Mura sighit sa navigatzione conca a nord, mantenende malamente una velotzidade de 9 nodos cun s’Open 50 cosa sua. Sa punna est de atraessare s’Atlànticu e posca iscùdere conca a Sa Coruña, in Ispagna, dae ue at mòvidu su 18 de onniasantu coladu, cando at printzipiadu custu disafiu mannu a ingìriu de su mundu.
Nointames is imprevistos, prolemas elètricos cun abbassamentos de tensione, su dannu a sa “sartia” de manca, su velista sardu est semper alligru e de ispètzia bona. A banda is messàgios de solidariedade a favore de campagnas benèficas che sa de s’AIDO (Assòtziu Italianu pro sa Donatzione de Òrganos), Mura poderat agiornados is tifosos cun is diretas suas de Facebook, cun 39 mìgia sighidores in su contu personale suo e ateretantos in sa pàgina de Vento di Sardegna, Andrea non mancat mai de chistionare in sardu e serrat ogna collegamentu saludende semper a sa pròpiu manera: A si biri e fortza paris”.
Su 29 de freàrgiu, a ora de is 10:35 locales, cando in finis at coladu s’ecuatore, Andrea at bòlidu festare sa resessida improvisende una direta faghende una tzantzarrada un sardu cun un’amigu ispetziale — su Deus Netunu – impersonadu dae issu etotu. In su vìdeu sa divinidade marina ddi pedit una botarga, e issu nde ddi intregat duas a càmbiu de unu praghere: saludare is fìgios Lucas e Marvel. Sa tzatzarrada cun su deus de su mare si concruit cun is saludos de Andrea in sardu: “ses tropu togu, speraus de si bìri un’atra borta”, e sa risposta di Netunu: “Veglio sempre su Vento di Sardegna, a presto e a si biri, come dite voi!”
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
