Su 10 e 11 maju 2025, Seui aberit sas ghennas a sa prima editzione de Pastòris – Fatus, fainas e lucuras in Beranu, un’eventu dedicadu a s’iscoperta de s’identidade agropastorale sua. Organizada dae su Comunu e dae sa Pro Loco, sa manifestatzione beranile seuesa at a furriare su tzentru istòricu de sa bidda ogiastrina in unu fraile a chelu abertu, intre nuscos antigos, sabidorias artisanas e sabores antigos.
Pastoris bolet èssere prus de una festa: in programma dimustratziones pràticas de murghidura, tundimenta, traballadura de sa lana, produtzione de su casu — cun protagonistas su casu agedu e su recotu — e a s’abrontu de pratos de sa traditzione comente culurgiones, pàrdulas, su civargeddu prenu.
Su programa proponet fintzas mustras, mùsica e momentos culturales. Sàbadu su 10 de maju, in sos camineddos de sa bidda ant a abèrrere unos 30 magasinos e paradas artesanales e enogastronòmicos. In sa matessi die ant a èssere inauguradas sa mustra “Archetipi in arte della tradizione agropastorale” de sa Fundatzione Seui, espositziones fotogràficas e s’interventu artìsticu de Kimbe Carboni. A sas 18:00 s’at a tènnere unu cunvegnu dedicadu a su libru Su testamentu de sa erbeghe de Antonio Are. In serada ispàtziu a sa traditzione cun sas caratzas de su grupu S’Urtzu e sa Mamulada, sa projetzione de su film Visioni Sarde e su cuntzertu de su triu Sonos & Cantos.
Sa die de domìnigu s’11 de maju s’aberit cun sa presentada de su libru Tundimentas, de Francesco Pintore. Sa die at a sighire cun giogos populares, mùsica in caminu, ispetàculos folclorìsticos e, a merie, sa presentada de su libru fotogràficu Transumanza, de Anna e Fabrizio Piroddi. Su finale at a èssere afidadu a sos sonadores de organitu Lai e Fadda, sighidos dae sa projetzione de su docufilm Seu Innoi, de Andrea Deidda.
Pro totu su fine de chida s’at a pòdere partetzipare a laboratòrios esperientziales dedicados a sa traballadura de su mele, de sa linna, de sa pedde: un’ocasione ùnica pro bìvere dae presu sas sabidorias antigas de su mundu de su pastoriu. Su programma cumpletu l’agatades in sa pàgina Seui Turismo.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
