S’oto de maju de s’annu giubilare 2025. Est custa sa data de s’«Habemus papam». Sos 133 cardinales, chi dae s’abertura de su Conclave de su die in antis ant giuradu fidelidade e segretesa cun sa manu in su Vangelu (e chi ant seberadu unu de issos cun modalidades de càrculu prus chi non terrenas), ant elègidu su de 267 pabas de s’istòria de sa Crèsia catòlica.
B’est chèrfida sa de tres fumadas pro annuntziare a su mundu cristianu sa nòmina de su sutzessore de Jorge Mario Bergoglio, mortu su lunis de Pasca a pustis de una maladia chi fiat istudende·nche·lu a bellu a bellu. In fatu a sa fumada arba (bi nd’at àpidu una niedda su 7 a sero e un’àtera su mangianu de s’8) su protogiàganu frantzesu Dominque Mamberti s’est acaradu a pratza annuntziende cun «gosu mannu» su nùmene nou de su romanu pontèfitze.
Leone XIV, custu su nùmene seberadu dae Robert Francis Prevost, cardinale istadunidensu nàschidu su 1955 in Chicago. Su conclave pro s’eletzione de su paba nou est comintzadu su 7 de maju cun s’«Extra Omnes» («Totu cantos a fora»)» e sa serrada de sa ghenna de sa Capella Sistina. Dae su matessi mangianu maicantas persones ant pigadu parte a sa missa Pro Eligendo in Santu Pedru. Dae tando sos ogros de is presentes acudidos a pratza fiant mirende a su columìngiu nòdidu isetende sa fumada arba e isperende chie in una figura a tretu de collire s’eredidade de Frantziscu o chie, a s’imbesse, de nche l’ispèrdere de su totu.
A custu paba l’ant fatu a lestru (pro Bergoglio b’at chèrfidu chimbe iscrutìnios); a bìdere istemus cantu a lestru at a fàghere pro si mustrare serente a su predetzessore suo o mancu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
