Su Comunu de Sant’Anna Arresi cunsignat sa posada de “Candiani” a sa Fundatzione Caminu Mineràriu de Santa Barbara.
In unu momentu de importu pro su patrimòniu mineràriu e s’ospitalidade in su territòriu, su Comunu de Sant’Anna Arresi at cunsignadu a sa Fundatzione Caminu Mineràriu de Santa Barbara una posada noa destinada a acollire sos pellegrinos chi percurrint sas tapas Masainas- Candiani- Tratalias, oferende unu logu pro si pasare ricu de istòria.
S’istrutura est sa de oto posada in su percursu de su Caminu Mineràriu de Santa Barbara: 500 km in 30 tapas in su Surcis-Iglesiente, Arburese e Guspinese. Est a intro de su cumplessu immobiliare de Casermas Candiani, de propiedade comunale e in coabitazione cun s’agèntzia Forestas, e at a èssere cuntzèdida in comodadu de impreu de badas a sa fundatzione de su Caminu.
Sa cunsigna rapresentat unu passu de importu pro afortiare sa rete de acasàgiu dedicada a sos pellegrinos gràtzias a sos 8 letos disponìbiles partinde dae su mese de cabudanni.
“S’initziativa, chi s’insertat in su progetu de valorizatzione de su patrimòniu mineràriu e culturale – at naradu su presidente de sa fundatzione de su Caminu, Mauro Usai – testimòniat s’impìnniu comunu pro rèndere su caminu semper prus atzessìbile afortiende su ligàmene intre territòriu, traditzione e turismu sustenìbile”.
Pro su sìndigu Paolo Luigi Dessì, est “una die importante pro Sant’Anna Arresi chi, paris cun sa Fundatzione e in collaboratzione cun s’Agèntzia Forestas, batit a cumprimentu unu progetu ambitziosu, cumintzadu carchi annu a oe, e chi como cunsentit de variare sa proposta turìstica: non petzi mare, ma fintzas paisàgiu e patrimòniu naturalìsticu cun sa pinneta de Candiani, un’unicum in su Mediterràneu”.
Cuntenta pro sa nàschida de sa posada de “Candiani” fintzas Laura Tuveri, Architeta e Responsàbile setore tècnicu Agèntzia Forestas: “Semus cuntentos meda de custa cunvivèntzia cun sos pellegrinos de su Caminu Mineràriu de Santa Barbara pro intzentivare sa promotzione de su turismu sustenìbile”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
