Un’iscuadra chi non s’arrendit

Un’atra remunta. A pustis de su 4 a 3 contra a sa Sampdoria, cando su Casteddu at furriau una partida chi fiat perdende po 1 a 3, oi s’iscuadra ghiada dae Maran at demustradu chi est difìcili a beru a dda binci. In domo de su Sassuolo custu merie, a s’acabu de su primu tempu pariat chi depiat essi una gara pèrdia: 2 a 0 po s’iscuadra de domo cun is gol de Berardi (6′) e Duricic (36′).

Invecis su Casteddu s’est torrau a furriai. Est bastau unu gol de conca de Joao Pedro (51′) e unu rigori sballiau de su Sassuolo po allùiri sa gara un’atra borta. Sa mossa giusta dd’at fata Maran a su 77′ minutu boghendi Nandez e fendi intrai Ragatzu. Trèixi minutos po su cuartesu chi intzertat su tiru propiu a su de novanta minutos po su 2 a 2 finali.

“Dd’apo ischierau a destra pròpiu pro cicai de sfrutai sa capacidadi sua de giogada – narat Rolando Maran -. Est torrau a fai gol comenti in Copa Itàlia, ma non sceti custu. So cuntentu po issu, est unu òmine nasciu in Sardigna chi traballat cun impegnu”. E in fines a pitzus de sa gara: “Custa remunta depit essi unu atru tassellu in sa crèscita nosta. Seus andendi beni, ma in su matessi tempus depeus mantènni realismu”.

Po Daniele Ragatzu cussu de oi est unu gol importanti meda: “Su sentidu est sa cosa prus bella, superat fintzas cussas po is primos gol signaus cun su Casteddu, annos fait. Apu realitza unu bisu”.

Immoi su Casteddu depit preparai sa gara in domo cun sa Lazio, sa de tres iscuadra de su campionau. Una partida difìcili chi però su Casteddu at a giogai in domu a in antis de su publicu de sa Sardegna Arena. E custu podit essi unu elementu decisivu.

Foto: Cagliaricalcio.com

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.