Cada 9 de ghennàrgiu annanghimus un’annu dae sa dispedida de Larentu Pusceddu. In Thiniscole (sa segunda bidda sua, sende chi issu in cue nch’istaiat ma de Oroteddi fiat) sa nova trista lompeit a sa comunidade cando chi custa fiat nuschende de frascas de ramasinu, preparende·si pro Sant’Antoni de su fogu de su 2016.
Larentu finas a pustis de sa rèndida sua a s’eternidade nos at intregadu una bella faina literària sua, pòstuma, “S’arzola de s’ena”, chi mancu a lu fàghere a posta contat de isse matessi una bia tancados sos ogros.
«Mi so sapidu in fora de domo – leghimus – chena cuerru, nudu in pedde de mama, chena peruna birgonza e mi pariat de passizare in unu pradu de nie, ma non b’aiat fritu…».
Forsis sende biu no at retzidu su chi un’iscritore che a issu meressiat. Issu, chi contributu mannu at dadu a sa prosa in sardu e a s’idea de una limba natzionale pro sa literadura.
Forsis semus nois chi non nos semus sapidos de sa bonidade de sa faina sua, de “S’Arvore de sos tzinesos“, de “Mastru Taras“, de “Su belu de sa bonaura“, de “Dona Mallena” e de “Sordadu Nangu“, sos romanzos chi issu at bidu imprentados e chi si los at carignados che figigheddos. De grandu valore fintzas su discu suo “Dae s’umbra de s’istòria”, cun càntigos chi posca amus agatados iscritos in intro de sos libros essidos a pustis.
B’at unu venidore pro sa literadura in sardu? B’at unu pùblicu chi siat a tretu de sustènnere sa creatzione de sos iscritores de oe? A bortas naramus chi emmo e a bortas mancu naradu acò sas dudas chi movent dae milli còntigas e cuntierras fintzas cando sunt caratzadas in bonu.
Ma su chi contat est chi si oe podimus pensare a sos romanzos in sardu – un’idea galu laboratoriale e a s’ispissu voluntarìstica – custu est fintzas e mescamente mèritu suo.
Dae inoghe movamus. Non tantu dae sa punna de àere totu cantu como, ma dae sa de lassare a sas generatziones imbenientes un’iscusòrgiu linguìsticu. Est duncas a Larentu sigamus.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
