S’iscenàriu fiat fàtzile a l’intzertare. L’aìamus iscritu finas inoghe. S’iscenàriu de sa dereta vitoriosa in Frantza. E custu pighende in cunsideru tres puntos ebbia: su resurtadu de su primu turnu; sos sondàgios pro su segundu; sos giogos polìticos de sa banda prus moderada de su Fronte republicanu chi, emmo, non cheriat a Marine Le Pen ma nemmancu a Jean-Luc Mélenchon. Ma a contos male fatos si bi torrat.
Pro primu cosa cheret mentovada s’afluèntzia de su 66% e barda, una cosa chi non sutzediat dae su 1997. Fatu fatu cheret naradu chi sos frantzesos non si sunt fidados de sa croba Le Pen – Bardella chi, cunforma a sos ùrtimos sondàgios deviant leare nessi 250 sègios: sondàgios chi nos torraiant una majoria relativa ebbia (pro s’assoluta bi nde cheret 289) ma sa “cunfirma” de sa prima positzione. Imbetzes sos de s’estrema dereta no arribant a 150 lompende petzi a sa de tres positziones.
Binchet sa manca de su Nouveau Front Populaire cun 182 sègios e in intro de s’alleàntzia sa prima formatzione est sa de sa France Insoumise de Mélenchon. Sos tzentristas de Macron andant male e bene a su matessi tempus: nd’aiant 250 e como 168 ebbia, ma sunt arribados segundos brinchende·nche su Rassemblement National in triunfu su 9 de làmpadas (europeas) e su 30 de su matessi mese (primu turnu de sas legislativas).
Diamus duncas pòdere nàrrere chi sos binchidores sunt duos: Mélenchon, chi at dadu impèllida a su Front Populaire, e Macron, chi si mustrat comente unu carculadore cun sa mirada longa (in medas no aiant cumpresu su disinnu suo de cunvocare eletziones noas a pustis de su disacatu de sas europeas). Finamentas ca como comintzat su segundu turnu de su Fronte republicanu anti Mélenchon. Si non sunt renèssidos a nche l’aorare cun sas votatziones est capatze chi b’ant a renèssere dae oe, sende chi parte manna de su Nfp est mirende prus a Macron chi no a issu.
E si fintzas Mélenchon est bonu a fàghere contos, no est impossìbile a pensare chi isse etotu chèrgiat una cosa che a custa pro chi, binchidore in parte eris, potzat resurtare binchidore totale a su giru imbeniente. Si custu est s’iscenàriu nou, s’opositzione a su tzentru manca non bi l’at a fàghere Le Pen ebbia (chi imbetzes diat chèrrere bìdere a Mélenchon cumpromìtidu). Ma finamentas e mescamente sa France Insoumise.
