Medas persones faghent isport, pro abbarrare in forma o pro si pasare. Calicunu imbetzes ddu faghent pro agiudare sos àteros. Cun s’initziativa “Giro a nuoto della Sardegna” in su nùmene de sa fìgia Amelia iscumparta cando teniat sete annos, su campione de nàdidu Corrado Sorrentino a pustis de àere nadadu prus de 700 chilòmetros a inghìriu de s’ìsula at regortu prus de 51 mìgia èuros chi ant a èssere èssere donados a s’Ispidale microtzitèmicu de Casteddu.
Su dinari est arribbadu dae tzitadinos, impresas e amministratziones pùblicas. Ultres a su ‘monitoràgiu multiparamètricu’ de su repartu de oncoematologia pediàtrica de su Microtzitèmicu, chi est giai realidade gràtzias a un’investimentu de belle 19.000 èuros, “su dinari at a èssere impreadu in àteras initziativas in àmbitu sanitàriu pro sos pipios”, at ispiegadu Sorrentino durante un’addòbiu cun sos giornalistas paris cun s’assessore a s’Isport de su Comunu de Casteddu, Andrea Floris.
B’ant èssere àteras novidades. “S’idea pro s’istiu 2023 est de tzircumnavigare sas bator ìsulas sardas prus mannas, duncas Santu Antiogu, Asinara, Sa Madalena e Caprera”, at naradu Sorrentino. “In su matessi tempus torrare a fàghere su giru de sa Sardigna, ma in manera diferente. Deo apo a nadare, e paris cun àteros atletas de cursa e bitzicleta, mi diat pràghere torrare a fàghere su giru de Sardigna”.
A sa tzerimònia in sa Mediateca de su Mediterràneu bi fiant giornalistas, isponsor e meda voluntàrios chi ant acumpangiadu Sorrentino durante totu su “Giro della Sardegna”. “Custu – at sutaliniadu Sorrentino – pro nàrrere chi deo non so casteddaju ebbia, ma pruschetotu sardu. Sa gente m’at retzidu in manera familiare”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
