Sa de su sìndigu sotzialista in New York est una pellìcula noa? E cantu nos interessat s’arresonu in Sardigna? Unos cantos parallelismos podent agiudare a rispòndere a sa prima dimanda.
Zohran Mamdani est un’esponente de is Democratic socialists of Amèrica, sa manca de su Partidu democràticu americanu. No unu partidu polìticu indipendente de is traballadores, duncas. Como chi Mamdani est sìndigu de New York podimus sestare unu paragone cun s’amministratzione comunale de Liverpool de sos annos ‘80 chi fiat ghiada dae is de su Militant, sa manca de su Partidu laburista britànnicu.
Fintzas sa contrapositzione cun su guvernu tzentrale tenet assimìgios. Si oe in sos Istados unidos b’est Donald Trump, tando in su Rennu unidu bi fiat Margareth Tatcher, e si su presidente Usa at minetzadu narende “nemmancu unu soddu” pro sa tzitade, sa sennora de ferru aiat segadu a beru sos fundos pro sa tzitade amministrada dae sos sotzialistas de su Labour.
Is sotzialistas americanos però non sunt galu guvernende e duncas sos parallelismos finint inoghe. No ischimus si ant a aplicare sas pròpias medidas in contu de welfare o si ant a sufrire sa pressione de sos capitalistas de su Pd. Cun sa prima possibilidade est possibile chi a is Dsa nche los iscudant a foras de su partidu gasi comente sa dereta de Neil Kinnock nche giagareit dae su Labour a is de su Militant.
A tardu o a chitzo sas contradditziones ant a pòdere determinare o sas bases pro sa nàschida de unu partidu indipendente de sa classe operaja americana o sa derrota de sa manca sotzialista.
Ma est possìbile a fraigare su sotzialismu movende dae sas tzitades? Non bi l’ant fata dae Liverpool (su Militant fiat prus a manca de is Dsa e fintzas su Labour de Kinnock fiat prus a manca de Kamala Harris e Nancy Pelosi) e non bi l’ant a fàghere dae New York sena una batalla generale pro chi si potzat essire dae sos lìmites de s’ordinamentu prus generale chi est in favore de sos interessos de su mercadu.
E in Sardigna? Est possìbile a mòvere dae sas amministratzione locales pro promòvere polìticas sotzialistas? Petzi pro chircare unu tema chi est de grandu importu in sa terra nostra: est possìbile a b’àere comunidades energèticas e un’impreu de sas rinnovàbiles a tesu dae s’ispeculatzione sena su controllu pùblicu de sa produtzione e de sa distributzione, sena sotzialismu?
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
