Chenàbura coladu, s’8 de martzu, in su teatru Dal Verme de Milanu b’at àpidu sa serada de tzelebratzione de su Prèmiu internatzionale de poesia sarda 2024. A bìnchere est istada Anna Cristina Serra. Su Prèmiu Internatzionale de Poesia in Limba Sarda, est nàschidu dae un’idea de su poeta Nino Demurtas, de su dirigente de su CSCS Francesco Pranteddu, e de Aligi Sassu, autore de su logo. A su prèmiu ant partetzipadu 137 poetas chi ant mandadu poesias dae totu sa Sardigna, dae s’Itàlia e fintzas dae s’Europa.
A pustis de 10 annos, est torradu a Milanu su Prèmiu internatzionale de poesia sarda, presentadu dae Giacomo Serreli. Sa binchidora de s’editzione 2024 est Anna Cristina Serra, cun s’òpera “Crapiteddas”. Reconnoschimentos fintzas pro Teresa Piredda cun “Aintru de i-cust’amori” (setzione 1 pro poetas de limba sarda non residentes in Sardigna) e pro Pier Giuseppe Branca cun “Mancosedda, mancosa e tumbu” (setzione 2 pro poetas de limba sarda residentes).
Ammaniadu dae su Tzentru Sotziale e Culturale Sardu de Milanu (CSCS), cun s’amparu de sa Fundatzione Maria Carta e su patrotzìniu de sa FASI-Federatzione de sos Assòtzios Sardos in Itàlia, su Prèmiu tenet sa punna de avalorare sa poesia e sa literadura sarda fintzas foras de s’Ìsula.
Sa giuria, formada dae espertos de poesia, at fatu a ischire su giudìtziu suo in Nùgoro, a pustis de una valutatzione atenta de sas òperas presentadas. Sa de ocannu est sa de deghe editziones de su cuncursu, devènnidu un’eventu de importu mannu pro sos emigrados sardos in su mundu. S’editzione 2024 est istada intregada a su biadu de Paolo Pillonca, chi est istadu finas su presidente de sa primu editzione de su 1989.
A sa serada de chenàbura, aberta dae sos saludos istitutzionales de s’assessore Pierfrancesco Maran a nòmene de su Comunu de Milanu, ant partetzipafu artistas che a sos Tazenda, Fantafolk e Ensemble Classica Trio de Romano Pucci e Maria Giovanna Cherchi, chi ant fatu cummòvere su pùblicu, cantende cun issos sa cantzone “No potho reposare”. Sas poesias in gara sunt istadas lèghidas dae s’atoressa teatrale, iscritora, tradutora, dotzente e atoressa Clara Farina.
Su Prèmiu, presididu dae su professore Simone Pisano de s’Universidade pro Istràngios de Siena, chi at fatu una bella relata in sardu, est formada dae istudiosos de cabbale de sa limba sarda che a Cristiano Becciu, Duilio Caocci, Clara Farina, Gonaria Floris, Dino Manca, Domitilla Mannu, Antonio Rossi e Salvatore Tola.
Importante meda pro sa resessida de sa manifestatzione est istada sa collaboratzione cun sa Fundatzione Maria Carta; de issa, pro sa Die Internatzionale de sa Fèmina, Clara Farina at lèghidu sos versos bogados dae sa regorta “Cantu rituale”, tradutzione in sardu de sa poesia publicada in su 1974 dae Maria Carta in sa sìlloge “Canto rituale”.
Fotos de Clara Farina
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
