Una temporada legia s’est ghetada a terra dae eris a de note in su Sud Sardigna, in particulare in sa zona de su Campidanu mescamente in Casteddu e in su Sarrabus. Su disacatu majore est istadu causadu dae su crollu de unu ponte in s’istrada istatale 195 ‘Sulcitana’ ma nche sunt istados disacatos puru in Cabuderra, sa tzitade est abarrada isolada, e Uta in ue nd’est falada s’istrada provintziale 91.
Dae mangianu, cando ant bidu chi sa situatzione fiat divenende prus legia, sos sìndogos de sas tzitades e biddas pertocadas dae s’abba ant ordenadu sa serrada de is iscolas e de sos ufìtzios publicos: aici in Casteddu puru.
Finas a eris sa Protetzione Tzivile, pro canto pertocat sa die de oe, aiat diramadu un’avisu pro arriscu idrogeologicu grogu (bolet narrere mediu). Oe imbetzes sa situatzione est mudada e s’alerta est divennida ruja.
