Est un’annu profetosu pro sos binos sardos

Sa ruga de su binu sardu est signada: difatis est un’annu profetosu pro sas aziendas de s’Ìsula, a cumentzare dae Argiolas de Serdiana, chi a su Vinoway Wine selection est istada premiada comente a sa mègius cantina de Itàlia.

“Binu novidade de s’annu” est imbetze su G’Otzèanu 2018 de Arvisionadu de Benetuti. Ma sa Sardigna est sa mègius fintzas pro sas professionalidades suas. Est sardu su “Miglior Giovane Enologo italiano 2021”: Andrea Pala, 34 annos, de Luras, presidente de Assoenologi nazionale Giovani. S’annu coladu puru un’àteru sardu, Mariano Murru, presidente de Assoenologi Sardigna, fiat istadu decraradu enòlogu prus bravu de Itàlia.

In sos annos sa Sardigna at dimustradu de ofèrrere un’idea enològica innovativa e meda cualificada” at naradu su presidente de Vinoway Italia Davide Gangi. “A su chi paret, in su 90% de sos casos, ònnia binu de s’Ìsula est de calidade manna. Duncas, si podet nàrrere cun seguresa chi sa Sardigna depet èssere de esèmpiu pro medas regiones”.
Cantina Argiolas, diretore tècnicu Mariano Murru, at otentu una bona resèssida fintzas in sa seletzione de s’Universidade Iulm, ispetzializada in “neuro marketing”, cun s’eticheta de su Vermentino Sardegna 2017, chi at conchistadu su segundu postu.

Meda apretziados sos binos sardos: prus de 50 ant otentu una votatzione de primore, superiore de 91 tzentèsimos. Sa prus premiada est istada Argiolas etotu: deghe de sos deghes binos presentados ant otentu prus de 91, e chimbe nche ant isciaddidu sos 95 tzentèsimos. “Sos faeddos de su presidente Gangi sunt de importu meda pro totu su mundu enològicu sardu – at cummentadu Mariano Murru – sunt paràulas pretziosas chi sotant a sighire a fàghere semper mègius”.

Segundu Murru, si cunfirmat sa potentzialidade de s’ìsula, “e su traballu de calidade, siat in bìngia, siat in cantina, fatu dae professionistas semper prus apretziados, chi donant balore a custas prendas enològicas e a sa grandu bio-diversidade, cun prus de 200 bingedos autòctonos torrados a iscobèrrere e apretziados”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*