A pustis de sas seletziones de su 25 de cabudanni in pessu coladu, sos 11 giogadores sardos designados podent brincare su mare Tirrenu pro nche lòmpere a Roma e pro giogare sas partidas issoro in su torneu de fùbalu de sos deputados.
Custa sa rapresentativa sarda: Dario Giagoni (dae s’iscuadra de club de sa Lega); Salvatore Deidda, Francesco Mura, Barbara Polo e Gianni Lampis (Fratelli d’Italia); Ugo Cappellacci e Pietro Pittalis (Forza Italia); Silvio Lai (Partito democraico); Francesca Ghirra (Sinistra – Verdi); Emiliano Fenu e Susanna Cherchi (Movimento 5 stelle).
In su Senadu imbetzes giogant a calcetto tres melonianos (Antonella Casula, Giovannino Satta e s’istràngiu Marcello Pera), Marco Meloni (Pd) e Sabrina Licheri (M5s).
Sa cunvoca est fissada pro giòbia su 13 de santugaine, prima diada de su de deghennoe campionados, cun frùschios de comintzu a sas 10 in su terrinu de giogu de Montetzitòriu (àrbitrat Ettore Rosato) e a sas 10.30 in su Pala Madama (designada comente diretora de gara Liliana Segre in càmbiu de su veteranu Giorgio Napolitano).
In su mentres in Casteddu Christian Solinas, mancari timende s’esòneru ca a su presente est su penùltimu allenadore in sa classìfica de sos coach agradèssidos (e finamentas un’iscualìfica, ma pro cussa tocat de bìdere su protzedimentu de su 15 de nadale) est galu a cunvocare sa formatzione noa de viale Trento in càmbiu de sa chi s’est isgiunta cun s’infortùniu de Giorgio Todde e cun sa pèrdida de Lampis oramai pretzetadu in Roma.
Ma pro connòschere sa rosa, a su chi narat Solinas matessi, cheret chi isetemus sos chi Giorgia Meloni at a chèrrere in su campu de Chigi. E in ambas iscuadras, in Casteddu e in Roma, bi sunt sos giogadores de sa Lega chi non cherent istare in panchina.
Su campionadu est longu e sas partidas medas sunt. Ite at a bìnchere sa Sardigna? A bìdere istemus.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
