Pro su de tres annos Aristanis at acasagiadu “Fàulas – su fèstival chi bòrtulat is logos comunes in contu de Sardigna” organizadu dae Ans – Assemblea Natzionale Sarda, un’assòtziu de voluntàrios chi traballat pro tutelare e promòvere su patrimòniu linguìsticu, istòricu, culturale e ambientale sardu.
Ocannu su fèstival est istadu patrotzinadu dae su Comunu de Aristanis. Prus de 50 voluntàrios, 27 òspites sardos e internatzionales, 15 eventos e prus de 20 atividades cummertziales e produtivas de su territòriu interessadas: sunt unos cantos nùmeros de sa de tres editziones de Fàulas – su festival chi bòrtulat is logos comunes in contu de Sardigna.
Pro duas dies is bias de Aristanis sunt istadas animadas dae dibatas, mesas tundas, performance artìsticas e ispetàculos musicales. Oto eventos de is in calendàriu si sunt tentos in sardu, a dimustratzione de s’importu non petzi de faeddare “de” limba sarda, ma prus a prestu de faeddare “in” limba sarda.
“Dae su primu annu – narat Riccardo Pisu Maxia – amus chertu fàghere unu fèstival non petzi ‘in’ tzitade ma ‘cun’ sa tzitade, interessende su tessutu sotzioeconòmicu de Aristanis”.
“Non semus resèssidos a medire – faghent ischire da s’assòtziu -, is sentidos e is esperièntzias bìvidas in custas duas dies: ispantu, risos, dudas, ditza, iscobertas, cuntentesa, riflessiones, alligria, afetu, passèntzia, aficu, amighèntzia, apartenèntzia, unidade, intentos comunes, ispiratzione, bizzarria, cumpartzimentu e emantzipatzione. Amus chircadu, foras dae islogan, de organizare, realizare e bìvere ‘totus paris’. Custa editzione de Fàulas est istada una grandu resessida. E su mèritu est totu de s’ispìritu de unione e determinatzione de totus is sòtzios de Ans”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
