Unu cuntratu de filera tra pagu prus o mancu binti produtores sardos de birra artesanale e sa Cooperativa Ìsula Sarda chi riunit sos produtores sardos de laore. Dae sa Sardigna arribat su primu progetu in Itàlia pro sa creatzione de una filera regionale de sa birra.
Traballant a su progetu, chi punnat a devènnere unu modellu fintzas in sas àteras regiones italianas, su Cunsòrtziu Birra Italiana, sa cooperativa Isula Sarda e sa Coldiretti.
Gràtzias a sos 60 ètaros coltivados in s’atòngiu 2023 e regortos in s’istiu 2024, mancari sos fogos e sa sicagna, b’at giai sos primos resurtados. Sa cooperativa de produtores agrìculos, paris cun su cunsòrtziu de filera, at frunidu a sos massajos locales òrgiu de sa matessi variedade e assistèntzia agronòmica, garantende unu tziclu de produtzione controlladu. S’òrgiu regortu – faghet ischire sa Coldiretti – est cunferidu a sa cooperativa, chi ddu limpiat e faghet sa “calibradura” in antis de l’imbiare a sa malteria pro ddu fàghere in “maltu”. A pustis su maltu benit torradu e est prontu pro èssere impreadu dae sos produtores de birra.
Gràtzias a custu protzessu sos produtores agrìculos diat dèpere otènnere una remuneratzione prus arta respetu a sos prètzios de sa Borsa Merci de Bologna, mentras sos birrifìtzios resessent a reduire sos costos de trasportu de sa matèria prima ca at a èssere semper a disponimentu in Sardigna.
Pro su benidore su progetu previdet cursos de formatzione pro sos massajos subra su coltivu de s’òrgiu e sa crèschida de sas superfìtzies coltivadas, cun s’obietivu de ammanniare sa produtzione. In programa b’at finas sa creatzione de sos “Caminos de sa Birra sarda” pro sa promotzione de su “birraturismo”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
