Su comitadu norvegesu pro su Nobel at assignadu su Prèmiu Nobel pro sa Paghe 2025 a María Corina Machado, leader de s’opositzione de su Venezuela, “pro s’impinnu suo in sa promotzione de is diritos democràticos e pro sa lota conca a sa transitzione dae sa ditadura a sa democratzia”.
Duncas, comente fiat prevedìbile, Donald Trump no at pigadu su prèmiu mancari dd’aiat pedidu prus bortas a pustis de s’acòrdiu intre Israele e Hamas in Gaza.
Machado, faghet ischìre su comitadu, chi at fundadu s’organizatzione Súmate, dae prus de binti annos lutat pro otènnere eletziones lìberas, diritos tziviles e indipendèntzia de sa magistradura, oponende·si a su règimene autoritàriu instauradu in Venezuela dae su presidente Nicolàs Maduro. “Fiat istadu unu sèberu de ischedas eletorales in càmbiu de sas ballas”, at ammentadu su Comitadu tzitende sas paràulas suas.
Nointames sa repressione, is minetzas e is oposidores firmados dae sa giustitzia, Machado at sighidu a s’adobbare pro sa libertade de su Paisu suo. In su 2024, a pustis chi su guvernu at esclùdidu sa candidadura presidentziale sua, at sustènnidu Edmundo González Urrutia, resessende a mobilitare chèntinas de mìgias de tzitadinos comente a osservadores eletorales pro garantire unu votu trasparente. Is resurtados otènnidos dae s’opositzione ant ammustradu una vitòria crara, ma su règimene at refudadu de la reconnòschere.
Pro su Comitadu norvegesu, Machado est una figura crae chi at postu de acòrdiu un’opositzione, unu tempus partzida a fundu, chi at fatu fronte comune cun sa rechesta de eletziones lìberas e de unu guvernu rapresentativu. In s’ùrtimu annu Machado est istada custrinta a bìvere cuada in clandestinidade. Mancari is minetzas a sa vida sua est abarrada in Venezuela, unu sèberu chi at ispiradu milliones de pessones.
“Tenet bia sa frama de sa democratzia in mesu de un’oscuridade chi creschet” est iscritu in sa motivatzione de su Nobel. “Incarnat s’isperu de unu benidore in cale is diritos de sa gente siant amparados e is boghes issoro in fines ascurtadas”.
Tocat finas a nàrrere, comente iscriet Il Post, chi María Corina Machado est finas una polìtica de dereta chi est contra a unu regìmene chi Donald Trump sighit a cuntrastare. De prus, segundu s’agentzia Dire, Machado a pustis de aere promòvidu unu referendum in su 2002 chi chircaiat de revocare su mandadu de su presidente venezuelanu de tando Ugo Chavez, aiat dèpidu parare fronte a duos protzessos: unu pro corrutzione, un’àteru pro tentativu de “golpe”. In ambos però est essida sena culpas. Pro is initziativas suas George W. Bush dd’aiat retzida a sa Casa Bianca.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
