In Polònia non b’est prus su guvernu populista de Jarosław Kaczyński. Ma a su presente su de mudare sa legislatzione reatzionària in contu de diritos feminiles abarrat una promissa eletorale ebbia de sos chi ant bìnchidu sas votatziones coladas.
In sos ùrtimos annos sa dereta de su partidu Pis at minimadu sas possibilidades de istrumare a unos cantos (pagos meda) casos. Pro custu, e finamentas pro chi in cuddu Paisu non b’apat àpidu unu càmbiu eletorale ebbia, sighit sa protesta, fintzas addae de sas làcanas natzionales.
Sa chistione est bene arraighinada in Sardigna in ue, dae tempus, b’at unu sustegnu a sas fèminas polacas de Strajk Kobiet (chi cheret nàrrere “isciòperu de sas fèminas”).
Inoghe, in custas dies, b’at àpidu un’adesione cun fotografias de òmines e fèminas (cun su cartellu Strajk Kobiet in manos) e cun messàgios a su Consoladu.
«Est gràtzias a sas fèminas polacas – narat Marta Lempart, ghia de su movimentu – chi sos guvernantes noos ant bìnchidu. Ma furada nos l’ant custa vitòria. Nois, sas fèminas chi ant protestadu, chi ant isperimentadu sa violèntzia de sa politzia e s’opressione de s’istadu, b’amus unu presidente nou de su parlamentu, cun su partidu suo, chi nos ruspit a cara ghetende·si a pare cun sos opressores nostros. Comente podimus bìdere, s’òdiu contra a sas fèminas nche bàrigat cada làcana polìtica. Naturale chi gherramus contra a custa cosa e pro custu est chi pedimus solidariedade internatzionale, mancari pensaìamus chi non bi nd’aiat prus de bisòngiu».
«Dae unos cantos annos amus disinnadu de sustènnere sas fèminas polacas e de fàghere connòschere sas cunditziones de sos diritos issoro violados – annanghet Carla Porcheddu, fundadora de Strajk Kobiet Sardynia –: e fintzas in custa ocasione l’amus fatu. In solidariedade cun sas sorres de s’Europa mesana, emmo, ma a concruos de totu pro cada fèmina, fintzas pro sas sardas. Su chi b’at in Polònia nos ammustrat chi sos diritos chi diant pàrrere achiridos in finitia no lu sunt e chi duncas tocat a istare semper bene atentos».
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
