Cando is tifosos casteddajos nche aiat betadu a mare is Hooligans inglesos

Sunt colados prus de 30 annos dae su Mundiale de Itàlia ’90, ma in Casteddu est galu forte su regordu de is Hooligans inglesos chi aiat fatu bìvere dies de pensamentu a tzitadinos e fortzas de s’òrdine. Sa tzitade fiat istada seberada comente sede de tres garas de su girone F: Inghilterra-Irlanda, Inghilterra-Olanda, Inghilterra-Egitu. Sustu sèberu non fiat istadu leadu pro de badas, ma pro chircare de limitare possìbiles atziones violentas de is tifosos.

Pro more de su chi fiat acontèssidu a s’Heysel de Bruxelles in su 1985, cando is iscravatòrios tra sustenidores inglesos e italianos aiant causadu 39 mortos e su ferimentu de prus de 600 persones, is iscuadras britànnicas fiant istadas esclùdias finas a su 1990 dae is cumpetitziones internatzionales.

Una truma manna de tifosos afelonados e imbriagos pro s’esìliu isportivu fiat prontu a isfogare totu su s’arràbiu arrimadu in custos 5 annos e prus de esìliu. In sa note tra s’8 e su 9 de mese làmpadas Casteddu divenit teatru de una bera batalla tra Hooligans e agentes de sa politzia in assetu de gherra. Su coro de sa gherrilla est sa Marina, acanta is inglesos cumentzant a iscùdere pedra e ampullas de bidru contra is fortzas de s’òrdine chi rispondent carrighende sa truma rabiada de tifosos e firmende.nde 60. Is ischimèrrios at a sighire fintzas is dies imbenientes, ma sena cunseguèntzias graes pro s’òrdine pùblicu.

Difatis, comente fiat essidu a campu tempus a pustis, su ministeru aiat mandadu in Sardigna una surra de agentes in burghesu chi fiant resèssidos a abrandare sa fùria de is inglesos. ma su mèritu fiat istadu fintzas de medas “voluntàrios sardos” (tifoseria sarda de is Sconvolts e Furiosi ) chi aiant acudidu dae totu s’Ìsula detzìdidos a si fàghere respetare betende∙nche, a beru, is tifosos prus callentes a mare. Su guvernu inglesu non si fiat chesciadu, antzis aiat apretziadu.

Immoe in Inghilterra, gràtzias a sa responsabilizatzione de sa sotziedade, a su megioru de is istruturas e a unu ruolu ativu de s’Istadu su fenòmenu de su tifu violentu est istadu risòrvidu.

Pro ndi ischire de prus: 


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*