Cumintzant oe in Orane sas ripresas de su film “I fili della memoria. Progetto per un film su Marianna Bussalai”, un’òpera chi tzèlebrat sa vida de Marianna Bussalai, figura de importu de sa cultura e de s’antifascismu sardu.
Su film est dirìgidu dae Gianluca Medas chi dd’at iscritu in paris cun Maria Grazia Perria, e prodùidu dae assòtziu Figli d’Arte Medas e Terra de Punt cun su contributu de sa Fundatzione de Sardigna e su patrotzìniu de su Comunu de Orane. Protagonista de su progetu est Marisa Serra, atora de Durgali giai connota pro àere interpretadu Grazia Deledda in su film “L’amore e la gloria“.
“Contare sa vida de Marianna Bussalai bolet nàrrere donare dignidade a una fèmina chi at ischidu brincare sas làcanas de su tempus suo. Est unu biàgiu in sa cultura sarda” narat Gianluca Medas.
Marianna Bussalai (1904-1947) est istada una poetissa, un’ativista, una de sas figuras prus mannas de s’antifascismu in Sardigna. Nàschida e crèschida in Orane, connota comente “Mariannedda ‘e sos Battor Moros”, aiat dedicadu sa vida sua a sa càusa indipendentista e a sa resistèntzia contra a su fascismu. Membru ativu de su Partidu Sardu de Atzione, Marianna Bussalai teniat meda a s’identidade sarda, comente si podet cumprèndere dae sa currispondèntzia sua cun intelletuales e de s’època, intre cale Emilio Lussu, Luigi Oggiano e Titino Melis.
Mancari no apat pòdidu sighire sos istùdios pro more de una maladia, Marianna aiat istudiadu comente autodidata e trasformadu domo sua in unu tzentru de cultura e resistèntzia, ue organizaiat addòbios, insinnaiat a lèghere e iscrìere a sa gente da sa bidda sua. Domo sua fiat devènnida un’amparu seguru pro sos oposidores de su règimene fascista e una logu de dibatas.
Bussalai est istada una figura de gabale e balentiosa, pronta a arriscare sa presone pro amparare sos cumpàngios e sos ideales suos.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
