Torrant a partire is cursos de formatzione linguìstica pro dipendentes regionales e operadores de isportellos linguìsticos, e pro s’afortiamentu de su sardu in is Universidades de Casteddu e Tàtari. Su Servìtziu Limba e Cultura Sarda de sa Regione, in atuatzione de su Pianu pro sa Polìtica Linguìstica (Ppl) 2020-2024, at aviadu, in totu su territòriu is atividades formativas previstas pro sa limba sarda.
Is destinatàrios printzipales de is atziones prevìdidas sunt dipendentes pùblicos, operadores linguìsticos, istudiantes e tzitadinos. Dae oe inghitzant is cursos de sardu – livellu printzipiantes e avantzadu – e is cursos de catalanu de S’Alighera, pro is dipendentes de s’Amministratzione regionale. Su primu e ùrtimu cursu pro dipendentes regionales est istadu aparitzadu in su 2007. Is cursos ant a permìtere, prus che totu a is chi pro traballu tenent raportos istintos cun su pùblicu, de lòmpere a unu livellu bonu de connoschimentu orale e iscritu de su sardu e de su catalanu de S’Alighera.
Partint fintzas is cursos pro formare operadores noos de isportellu linguìsticu e cussos pro is chi sunt giai operadores. Is isportellos linguìsticos, finantziados cun fundos regionales e fundos istatales e ispartzinados in totu su territòriu regionale acanta is Entes Locales de sa Sardigna, sunt unu trastu fundamentale pro s’afortiamentu de su sardu. In is meses de cabudanni e landàmene de ocannu, s’Isportellu Linguìsticu Regionale at a contivigiare unas atividades formativas ispetzìficas pro megiorare e afinare is cumpetèntzias de is operadores de isportellu chi sunt giai traballende.
Tra pagu at a essire un’Avisu pro s’acumprimentu de atividades formativas afidadas a agèntzias formativas ispetzializadas, de sa durada de 120 oras, chi ant a èssere destinadas a formare operadores de Isportellu linguìsticu noos. Dae a su mancu oto annos non beniant realizadas fainas che a custas e sa netzessidade de formare personale nou est istada presentada siat dae impresas e assòtzios culturales chi gestint atividades, siat dae is Entes Locales.
Fintzas pro ocannu ant a bènnere finantziados is cursos in limba sarda, prus che totu pro sa formatzione de su personale in servìtziu in is Entes territoriales e abertos fintzas a is tzitadinos, pro more de cunsentire s’achirimentu de cumpetèntzias in s’impreu orale e iscritu de sa limba minoritària.
Pro is istudiantes universitàrios puru comintzant is fainas de formatzione post-laùrea. S’Universidade de Casteddu bolet afortiare s’insegnamentu de su sardu durante su tziclu de istùdios triennale e in su biènniu de ispetzializatzione pro mèdiu de un’importante afortigamentu de is laboratòrios linguìsticos e at fintzas propostu a sa Regione s’istitutzione de unu Master annuale de II° livellu in didàtica de su sardu.
S’Universidade de Tàtari at presentadu s’oferta formativa de su curriculum de “Limbas e culturas de sa Sardigna” laùrea magistrale, chi at a cumintzare in s’annu acadèmicu 2021-2022 e at a cumprèndere s’insegnamentu de matèrias universitàrias in limba sarda e peri sa realizatzione de fainas laboratoriales in sardu e in is limbas alloglotas de sa Sardigna (catalanu de S’Alighera, tataresu, gadduresu, tabarchinu).
Sa Regione Sardigna at a sustentare in manera finantziària is interventos de is Universidades de Casteddu e Tàtari co-finantziende is laboratòrios linguìsticos. Sa punna de custas atividades est de permìtere a chie si siat de si pòdere formare in sardu e subra de su sardu.
