Greta Thunberg, sa picioca de seixi annos de sa Svetzia chi est gherrendi contra a is mudamentos de su clima, est sa persona de s’annu 2019 segundu sa revista Time chi dd’at posta in sa prima pagina cun su titulu ‘Sa fortza de sa gioventudi’. Finas a oi nisciuna persona de s’etadi sua aiat pigau custu reconoscimentu.
“In un’annu sceti, una seixenni de Stoccolma chi a sola aiat cumentzau una protesta a in antis de su Parlamentu de s’Istadu suu est arrennescia a ghiai unu movimentu de giòvunus de totu su mundu” narat su giornali americanu. Chi sìghit a sutalineai: “Eus seberau Greta poita issa at ghetau s’allarme a pitzus de su clima e de s’ambiente chi teneus, at unidu unu mundu divisu andendi ultras is làcanas”. Sa protesta de Greta, difatis, est arrennescia a nci portai in pratza fintzas is giovanus de sa Sardigna: cun su movimentu ‘Fridays for future’ meda piciocus e piociocas, prus bortas, ant protestau po nai chi si sigheus a incaddotzai sa terra comente seus faendi at a essi sa fini nostra e de su mundu puru.
In paris cun Greta Thunberg nci fiant atras personas candidadas dae is giornalistas, comente su presidenti americanu Donald Trump, sa speaker de sa Camera Usa, Nancy Pelosi, is manifestantes de Hong Kong, e cussu chi aiat scoviau is intrallatzos de su matessi Trump po canto pertocat s’impeachment.
Su Time seberat sa personalidadi de s’annu dae su 1927 e donat riconoscimentus fintzas po atras categorias. Comente ‘Guardianos de s’annu’ nci sunt is funtzionarios de s’Istadu americanu chi ant faeddau in Capitol Hill po s’impeachment de Trump. Nc’est puru Bob Iger de sa Disney: est ‘s’òmini de affari de s’annu’. In fines: s’iscuadra feminile de bòcia de is Usa est istada seberada comente ‘atleta de s’annu’ mentras sa cantanti Lizzo est sa ‘entertainer’ de s’annu.
