Una campagna pro sutapònnere totus is sardos a test lestros, pro isulare is epitzentros e abbassare sa curva de s’epidèmia. At a partire a Nadale su controllu generale de sa populatzione detzisu dae sa Regione pro compidare s’andamentu de sa pandemia e parare fronte a sa cundidura de Coronavirus.
Dd’at fatu a ischire su guvernadore Christian Solinas, a pustis de un’addòbiu tra s’assessoradu de sa Sanidade, s’Ats e Andrea Crisanti s’espertu chi dae immoe in susu at a acostagiare sa Regione in s’istrategia contra su coronavirus. “At a èssere posta in motu totu s’istrutura sanitària regionale – narat Solinas – e nos amus a fàghere agiudare dae sa Protetzione Tzivile Eegionale, dae sa Croce Ruja e dae sa sanidade militare. Sa campagna de controllu at a cumentzare dae is logos cun prus casos de contàgiu e sighi-sighi at a interessare totu s’Ìsula”.
Su controllu generale de sa populatzione, chi in medas aiant pedidu giai dae is primas fases de sa pandemia, arribbat immoe chi s’ìsula nostra est a su de bator postos in Itàlia in is pertzentuales de crèschida de casos de Covid, cun su 13,2%. In prus, comente postu a notu dae sa fundatzione Gimbe, sa Sardigna una de is pagas regiones acanta, a su presente, aumentant is casos positivos (925 ogna 100.000 abitantes).
Is proas ant a èssere fatas in intro de is istruturas sanitàrias, ma si esseret a bisongiare finta in istruturas mòbiles chi ant a èssere cuncordadas cun s’agiudu de is Comunos. Ant a èssere impreadas duas castas de tampones lestros: su primu, de su cale nd’ant a arribare 800 mìgia petzos, est unu tampone chi donat s’èsitu intro 13 minutos. S’àteru, 200 mìgia test antigènicos lestros, chi su pròpiu donat su resurtadu in 13 minutos, ma faghent s’anàlisi de su campione pro mèdiu de una machineta elètrica. Su gradu de afidabilidade, faghent ischire dae sa Regione, est artu meda. Is tampones de su primu tipu podent èssere impreados fintzas a s’abertu, in cale si chi siat postatzione, is segundos imbetzes pro funtzionare tenent bisòngiu de sa currente elètrica. Su protocollu previdet chi sa proa bèngiat repìtida a pustis de 7-8 dies e chie at a resurtare positivu at a èssere sutapostu a tampone molecolare.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
