Chimbe registas sardos premiados in su Babel film fèstival. Est istadu unu cuncursu de importu pro su tzìnema sardu cuddu chi est acabbadu sàbadu in su T-hotel de Casteddu.
Difatis a su fèstival Babel, intregadu a sas pellìculas in sas limbas de minorias de totu su mundu, chimbe tra sos trèighi prèmios sunt istados bìnchidos dae registas de sa Sardigna chi duncas ant realizadu film in limba sarda.
Ant bìnchidu unu prèmiu de importu Andrea Cannas cun ‘Mira sa dì’ e Matteo Incollu cun ‘Male Fadau’ chi ant cumpartzidu su prèmiu Maestrale pro su mègius curtzumetragiu. Marco Antonio Pani at pigadu su prèmiu Italymbas cun ‘Maialetto della Nurra’ mentras Àrbores de Francesco Bussalai at pigadu su prèmiu Ostana e Marco Spanu su Fedic Cagliari gràtzias a sa pellìcula ‘Con la S maiuscola’.
Est istadu premiadu cun su prèmiu Mastrale su film ‘Ndoto Ya Samira — il sogno di Samira’ de su regista pugliesu Nino Tropiano pro su mègius longu-metràgiu (6.000 èuros). Contat un’istòria de emantzipatzione feminile ambientada a Zanzibar contada in irlandesu e swahili. Su tìtulu ‘Talking Dreams’ de su bergamascu Bruno Rocchi e ambientadu in unu bidditzolu de s’Àfrica otzidentale est su mègius documentàriu (2.500 èuros). Premiados puru Otra Mano de Agu Netto, Mateoren Ama de Aitor Arregi e Jose Mari Goenaga, ‘Prima che arrivi l’estate’ de Francesco Di Martino, ‘Emilia’ de Cristina Guillen, ‘Stolen Fish’ de Gosia Juszczak, ‘Silent Heat’ de Lucienne Venner, ‘Isole’ de Mario Brenta e Karine De Villers, ‘Bosch i Morata, sempre els quatre’ de Miquel Notari e Rafa Alborch ‘La desapariciòn’ de Jonathan Millet.
Su Babel, a sa de sete editziones, benit organizadu ogna duos annos dae sa Cineteca Sarda, Assòtziu Babel in paris cun Terra de Punt. Est s’ùnicu festival de su mundu intregadu a sas limbas de minorias.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
