Nos signalant s’essida de unu libru nou in limba sarda. A Papai cun Pìricu Cunìlliu – Retzetas dae su Mundu de Beatrix Potter est su traballu nou de Alessio Pani e Stefània Carta.
Si tratat de su primu libru de coghina ispiradu a sas òperas de Beatrix Potter (1866 –1943), una de sas prus autoras inglesas istimadas, istudiadas e traduidas de su mundu.
A pustis de àere bortadu in limba sarda chimbe contos de s’autora cun su volume bilìngue Pìricu Cunìlliu Pilete e àteras Contàssias, sos autores torrant a su mundu de Beatrix Potter cun unu libru de coghina originale ispiradu a sos màndigos mentovados in custas òperas.
Su volume, chi unit literadura, folclore e coghina inglesa, cuntenet siat retzetas originales siat retzetas traditzionales inglesas, adatadas dae sos libros de coghina prus populares de su de XIX sèculos.
Su volumene, totu a colores, est ingalanidu cun sas illustratziones de Beatrix Potter, tzitatziones e fotografias a colores e agabbat cun unu glossàriu sardu-inglesu-italianu pintadu a manu dae Stefània Carta cun prus de chentu paràulas de coghina. Su libru si podet comporare in Youcanprint, Ibs, Saribs e Amazon.
Sos autores, Stefania Carta (dutora in mediatzione linguìstica e literas) e Alessio Pani (dutore in informàtica e programmadore), ativistas de sa limba sarda, ant publicadu, lassende Piricu Cunìlliu Pilete e àteras Contàssias un’antologia di contos in sardu de Gràtzia Deledda, Sònnios de Ierru – Contos de Pasca de Nadale e contivigiant unu blog de divulgatzione literària in sardu Ite mi Contas? – Sa Literadura in Limba Tua e de coghina Ite Mi Coghes – Sa Coghina in Limba Tua. Stefània at publicadu su volume S’Alfabetu de sos Hobbit e iscriet in sardu, italianu e catalanu in su situ S’Arda Tolkien Sardegna; Alèssio curat su blog Sardumatica e partètzipat a s’isvilupu di aplicatziones e programmas in sardu cun Sardware.
