Sa presidente de sa Regione Sardigna, Alessandra Todde, at cunfirmadu cun detzisione sa lìnia de sa giunta cosa sua: peruna privatizatzione de su servìtziu ìdricu. S’abba, at naradu sa guvernadora, “est unu bene de totus e depet abarrare pùblica”, torrende a afirmare gasi unu de is puntos primàrgios de su programa regionale in matèria de risursas ìdricas e gestione de is servìtzios essentziales.
Sa detzisione arribbat a pustis de s’aprovatzione tècnica e polìtica de su Comitadu Istitutzionale de Àmbitu de s’Ente de Guvernu de s’Àmbitu de sa Sardigna (EGAS), chi at naradu ch’eja a su sighimentu de s’intrega in partetzipatzione pùbblica a Abbanoa, sa sotziedade chi at a sighire a gestire su servìtziu ìdricu in totu s’ìsula.
Sa Regione at fatu ischire ca in is ùrtimos meses at traballadu pro afortiare sa gestione pùblica de su servìtziu e pro consolidare su ruolu de Abbanoa, chi at aviadu giai una reorganizatzione interna manna e unu pianu de investimentos triennale 2026-2028 chi punnat a s’amodernamentu de is infrastruturas ìdricas e a su megioru de sa calidade de su servìtziu.
Tra is resurtados postos a notu dae sa giunta Todde, ddoe est sa gestione de s’apretu dèpidu a sa sicagna in Nurra e in Baronia, abrandada a parre suo dae is interventos lestros e a collaboratzione cun is sìndigos de is territòrios interessados e fintzas gràtzias a un’afortigamentu de sa comunicatzione cun is tzitadinos, pro garantire trasparèntzia e agiornamentos continos in contu de traballos, interrutziones e interventos de assèliu.
De prus, Abbanoa at printzipiadu unu percursu de reinternalizatzione de is cumpetèntzias istratègicas, cun s’obietivu de gestire in modu cumpletu e autònomu totu su tziclu de s’abba, dae sa captatzione a sa depuratzione, in coerèntzia duncas cun sa natura sua de sotziedade pùblica.
Sa presidente Todde at decraradu ca “s’abba est unu deretu fundamentale e pro custu est pretzisu chi a totu is tzitadinos siat garantidu su matessi tratamentu, sena diferèntzias”. E at agiuntu: “Sa trasformatzione est giai cumintzada. Su caminu est galu longu, ma semus andende in sa diretzione giusta. S’abba depet restare pùblica, ca est unu bene de totus e non de pagos”.
Sa die etotu chi Alessandra Todde annuntziaiat sa lìnia noa in contu de guvernu de s’abba pùblica e de gestione de s’apretu ìdricu, s’ex presidente de sa Regione Mauro Pili at publicadu unu vìdeu-denùntzia dae sa diga de Pranu Antoni, intre Busache e Fordongianus. In su vìdeu, cumpartzidu in is retes sotziales, Pili at afirmadu comente una cantidade manna de abba bèngiat iscarrigada a mare in su coro de sa note, mancari sa Sardigna siat parende fronte una fase de sicagna mala meda.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
