Sa vida a pustis de sa morte. Est acontèssidu in Cùllieri in ue, un’annu a oe, unu fogu mannu aiat brusiadu ètaras e ètaras de padentes, fintzas s’ogiastru de Sa Tanca Manna chi teniat prus de duamìgia annos.
Como però s’àrbore est torrende a nàschere. Dd’at naradu su diretore de s’Ortu Botànicu de Casteddu, Gianluigi Bacchetta, chi in custos meses, paris cun su Comunu de Cùllieri e cun s’assòtziu Montiferru, at batidu a in antis diversas initziativas pro chircare de amparare su chi abarraiat de sa mata.
Chi cun ispantu mannu immoe est torrende a vida noa: a su cumentzu de beranu, gràtzias a su traballu fatu dae s’istiu a oe, sunt crèschidas tres froeddas noas de unos 40 centìmetros. “Cust’àrbore est sìmbulu de resilièntzia pro sa gente ferta dae custu disacatu mannu”, at afirmadu Bacchetta.
Is fainas pro sighire a amparare s’ogiastru ant a sighire, mancari siat impossìbile torrare a bìdere sa Tanca Manna comente fiat prima de su fogu. Su ‘patriarca’, comente est numenadu pro s’istòria sua, est semper istadu su sìmbulu de sa gente de Cùllieri e un’atràida pro is turistas, ultres a èssere una tra is matas prus betzas de Sardigna e de s’Itàlia.
Su fogu chi aiat brusiadu s’àrbore de sa Tanca Manna in su mese de Argiolas de su 2021 si nche aiat mandigadu puru bintimìgia ètaras de terra in sos sartos de Santu Lussùrgiu, Cùllieri, Tresnuraghes, Frussìo, Sinnarìolo, Usèllus, Portu Alabe, Iscanu e Crabas. Un’acadessimentu chi aiat cajonadu meda disacatos finas a aziendas, domos e bestias. E in Cùllieri su dannu peus aiat fèrridu pròpiu su setore prus de importu, cuddu de is olias. In is dies a pustis su Montiferru aiat retzidu agiudu e solidariedade dae totu sa Sardigna gràtzias a regortas de dinari e de matas de torrare a pònnere in is campos brusiados.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
