Unu cursu po chistionai in sardu. Ddu organizat in Casteddu s’assotziu Lìngua Bia in su bixinau de Is Mirrionis. S’at a tènni una borta a sa scida e at a cumentzai su 20 de gennàrgiu. Su tìtulu est ‘Arrexonadas in sardu’ cun su maistu Ivo Murgia.
“Custu no est unu cursu po imparai a ligi e scriri in sardu – narant dae s’assotziu -, ma est unu cursu po ponni sa genti a chistionai e binci cudda bregùngia tonta chi si nc’ant postu in conca. Fueddendi in sardu si ndi torraus a ponni meris de su linguatzu nostu, imparaus e si spassiaus. Ca su sardu si serbit fintzas po cumprendi prus beni su logu anca seus bivendi, sa terra nosta. S’arrexonada podit essi lìbera, a tema o movi de unu lìburu in sardu. Cumenti ndi bessint a pillu is chistionis, arrexonaus finas de is arrègulas de su sardu, de fonètica e de sintassi“.
Po fai parti a su cursu, tocat a sciri pagu pagu su sardu e a tenni gana de imparai e de si spassiai. Is letzionis ant a essi dònnia lunis dae is 7 a is 9 oras de merii, aundi est Lìngua Bia in Casteddu, bia Mandrolisai 60. “Su prètziu est 50 èuros prus sa tèssera po 10 atòbius de 2 oras. Po s’assentai, abastat a si presentai sa die de sa primu letzioni. A s’acabada eus a donai un’atestau de frecuèntzia”.
Lìngua Bia est unu assotziu chi traballat cun su sardu, in su Me-Ti su tzìrculu de bia Mandrolisai. “Pensai su spantu – est iscritu in sa pagina Facebook – seus sardus e no podeus fueddai e imparai su sardu. S’ant postu in conca ca su sardu est ‘inferiore’ a is atras lìnguas. Est comenti a nai ca nosus seus ‘inferiori’. No est beru. Is sardus funt comenti is atrus, e bolint essi liberus. A is chi no s’interessant de sa lìngua naraus chi funt cuendi una cosa chi no si podit cuai, e chi si depint acostai. A is chi s’interessant de sa lìngua naraus chi est su tempus de fai”.
