Su vìdeu, promòvidu dae s’ULS de Tortolì in ocasione de sa festa de Santu Balentinu, punnat a promòvere s’impreu de su sardu in cada cuntestu, motivende amministradores, dipendentes comunales e assòtzios a giogare unu ruolu ativu in sa difusione sua. S’Assessore Rita Cocco: “Su sardu est una limba pro amare“
A pònnere sa cara pro su vìdeu de una trentina segundos sunt is amministradores, dipendentes comunales, is pitzocos de su Tzentru de Agregatzione Sotziale de Tortolì e is sòtzios de sa Nuova Pro Loco Tortolì-Arbatax, chi ant aderidu cun brègiu a sa proposta de s’isportellu linguìsticu.
“T’amo: narasiddu in sardu”, faghet parte de una prus ampra campagna de sensibilizatzione pranificada dae s’Ufìtziu linguìsticu de Tortolì, finantziadu cun sa L. 482/99 e LR 22/2018 de sa Regione Sardigna. S’obietivu est su de animare amministradores, dipendentes comunales e assòtzios locales a devènnere protagonistas de sa promotzione de limba sarda, impreende·dda cun cussèntzia in cada cuntestu, non in s’àmbitu amministrativu ebbia, ma peri in cussu afetivu. Pro lòmpere a unu pùblicu prus ampru, sa campagna de promotzione e sensibilizatzione non s’at a limitare a sa festa de is innamorados, ma at a abbratzare fintzas àteras ocasiones comente sa festa de sa mama e de su babbu, sa die internatzionale de sa fèmina e sa de sa limba mama. Ant a èssere realizadas brochure e volantinos pro is famìlias, paris cun imàgines e contenutos chi ant a èssere ispartzinados in is retes sotziales.
“Amus seberadu de interessare is dipendentes, is amministradores comunales e is assòtzios locales pro afortiare su sentidu de responsabilidade chi issos tenent in is cunfrontos de is tzitadinos” – decrarat Rita Cocco, Assessora a sa Cultura de su Comunu de Tortolì-. “Sa Regione destinat risursas pro difùndere e avalorare su sardu in cada cuntestu, e sa festa de Santu Balentinu, sa die de is innamorados, est un’ocasione perfeta! Bolimus chi sa limba nostra non siat ungronada in is domos e in is cuntestos privados ebbia, ma chi torret a èssere una limba pùblica e de sa comunidade. In su matessi tempus, bolimus chi torret a èssere peri sa limba de is afetos e de s’intimidade, ca comente a totu is idiomas, fintzas su sardu est una limba romàntica. Duncas, su sardu est una limba de amare e pro amare!”.
Segundu su sìndigu Marcello Ladu, “non bastat bortare àutos amministrativos o si limitare a organizare cursos de formatzione pro promòvere su sardu. Est pretzisu chi cadaunu de nois s’impinnet a manera ativa, devenende un’atore e unu protagonista, donende s’esèmpiu suo alleghende·ddu in modu normale e fitianu”.
https://www.facebook.com/comuneditortoli/videos/921864822871959
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
