Non s’at a tènnere su referendum pro sa lege eletorale sustentadu dae sa Lega pro abrogare sas normas pro sa distributzione proportzionale de sos sègios e trasformare su sistema in unu majoritàriu puru. Sa Corte costitutzionale dd’at decraradu inammissìbile pro ite diat mudare tropu sa lege.
Su cuesitu referendàriu fiat istadu propostu dae oto cussìgios regionales (Vènetu, Piemonte, Lombardia, Friuli Venètzia Giulia, Sardigna, Abrutzu, Basilicata e Ligùria), totus ghiados dae su tzentru-destra. Su detzisu de sa Corte Costitutzionale, de decrarare inammissìbile su referendum, diat èssere istadu pigadu a majoria.
“Impedire a sos tzitadinos italianos de s’espressare in un’aspetu gai importante de sa democratzia e de sas Istitutziones, comente a est sa lege eletorale, est una derrota pro totus”. Gai su presidente de sa Regione Christian Solinas, tra sos sustenidores de sa proposta referendària, cummentat su detzisu de sa Consulta.
