Sighi∙nos

Salude, ite ses chirchende?

Cultura

“Su Marti Perra gairesu” unu de sos carrasegares antigos prus ispantosos de Sardigna

In Gàiru totu est prontu pro tzelebrare su corteu traditzionale de su Maimulu pro Su Marti Perra Gairesu, su Carrasegare traditzionale gairesu, in programma pro sàbadu 17 de freàrgiu. A  s’eventu, a banda sos carotes locales, ant a partetzipare finas màscheras de sa Sardigna e de Europa puru, comente sa caratza Dunkelfolket, chi benit dae Aalborg, in Danimarca.

In prus de sa professone de sas màscheras,  sos partetzipantes ant a tènnere s’oportunidade de tastare sos produtos tìpicos de su logu e de baddare cun sa mùsica traditzionale de Su Cunzertu Antigu e de su sonadore Simone Sirigu, e a tardu mannu de note finas de unu dj set. Sa manifestatzione at a èssere presentada dae Valentina Caruso e Bruno Agus!

Su Carrasegare gairesu est unu de sos prus ricos de màscheras e de figuras de totu sa Sardigna. A nde allegare pro prima fiat istada s’insegnante e istudiosa Pietrina Moretti chi in sos annos Sessanta de su sèculu coladu aiat publicadu unos cantos istùdios subra sas màscheras de Sardigna, descriende in modu pretzisu sa de Gàiru. Àteros particulares fiant essidos a campu gràtzias a tesis de làurea de s’argumentu e prus che totu a sas intervistas fatas dae sa Pro Loco. Totu custas informatziones ant permìtidu a s’Assòtziu culturale Su Maimulu, de torrare a cumpònnere su carrasegare traditzionale gairesu gosi comente fiat in s’antigòriu.

Su Marti Perra est su momentu prus importante de sa festa. In custa die, sas màscheras de su Maimulu (su carrasegare gairesu) essint fatu sos caminos de sa bidda, torrende a propònnere su rituale arcàicu e simbòlicu de sa luta tra su bene (is maimulus) e su male (s’ierru, sa natura agreste), personificada dae s’Urtzu ballabeni.

Sos personàgios printzipales, (s’Urtzu ballabeni, îs domadoris, îs maimulus, su cuadderi, su poddinaiu, su mamussoni, s’ingràstula, sa martinica e sa filadora) benint sighidos dae àtera figuras (su trusulau e su malandau), che tirant unu carretone cun in pitzu unu mustajoni, “Santu Nani“. In su carru benint carrigadas totu sas ofertas (cosa de papare e bufare) chi sa gente apicat in sas bentanas e in sos corridòrios sas domos. Pro nde boddire totu custas liconias, sas màscheras s’apicurrant in sas pinnas de sas domos e in sos palos de sa lughe, unu in pitzu de s’àteru, faghende unu muntone de trèulu e de tasis.

Su contu antigu de Marti Perra contat de unu gatu mannu chi si vengaiat cun sos chi sa die de festa si poniant a traballare, narende custos faeddos:

“Non mi neris ‘Atò’

ca Marti Perra so,

deu soi Marti Perra

benniu po ti fèrriri!

Custu su programma cumpletu de Marti Perra Gairesu:

Sàbadu su 17 de freàrgiu 2024

A sas 15:30: Cumintzu de sa professone  in sos caminos de sa bidda  cun sa partetzipatzione de sa màschera de gairesa de su Maimulu e àteras màscheras istràngias comente, sa Dunkelfolket de Aalborg (Danimarca), Sos Corriolos de Neunele, Sos Traigolzos de Sindia, S’Urtzu e sa Mamulada de Seui, Thurpos de Oroteddi, Mamutzones de Samugheu, S’Ainu Orriadore de Iscanu, Tintinnatos de Thiniscole e sos Tumbarinos de Gavoi.

A sas 18:00: Arribu de sos grupos a Pratza Melis acanta at ant a èssere cumbidadas a totus saa sìpulas . Sighint ballos sardos finas a note manna.


Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018

De lèghere

Cultura

S’Ars Artium Editrice e s’Assòtziu “Forma e Materia” annùntziant s’inghitzu de sa de chimbe editziones de su cuncursu literàriu “Faraglioni d’Ogliastra”, chi tenet sa...

Atualidade

In Putzu Idu Assemblea Natzionale Sarda at organizadu sa prima letzione de Yoga in limba. Cantas bias s’intendet nàrrere: “Su sardu non faghet a...

Cultura

Sighit mèrcuris su 17 in Lodine e giòbia su 18 de trìulas in Urtei (a pustis de s’esòrdiu de Iscanu e de sa segunda...

Cultura

Unu documentàriu subra de sa pratza IV Novembre e unu videoclip cun su tìtulu “Ombre sull’asfalto”. Sunt sos progetos finales de sos laboratòrios Kuntralab...